रइपुर, 2 मई 2021 इतवार। कोविड-19 महामारी ले निपटे बर स्वास्थ्य कार्यकर्ता, आगू पंक्ति कार्यकर्ता अउ 45 बछर ले जादा उम्मर के लोगन मन के टीकाकरण करे जावत हावय अउ एक मई ले 18 बछर ले उपराहा उमर वर्ग म पहिली चरण म अंत्योदय परिवार के लोगन मन के टीकाकरण प्रारंभ होगे हवय।
भारत सरकार के अधिकारी मन के प्रजेन्टेशन अउ मीडिया ब्रीफिंग के अनुसार स्वास्थ्य कार्यकर्ता मन के टीकाकरण म छत्तीसगढ राज्य़ पूरा देश म दूसरइया जगा म हे उहेंचे 45 साल ले उपराहा आयु के लोगन ल कोविड-19 वैक्सीन के पहिली डोज देहे म छत्तीसगढ़ पूरा देश म चौथइया हवय। ओइसनेहेच आगू पंक्ति कार्यकर्ता मन के टीकाकरण के मामला म छत्तीसगढ़ देश म छठवा नंबर म हे।
स्वास्थ्य कार्यकर्ता मन के टीकाकरण के मामला म पूरा देश म दूसरा सर्वश्रेष्ठ प्रदर्शन 97.73 प्रतिशत संग छत्तीसगढ़ राज्य के हवय । वर्तमान म छत्तीसगढ़ राज्य म पंजीकृत कुल 4894 सेशन साईट म टीकाकरण करे जावत हे अउ राज्य म 6823 प्रशिक्षित वैक्सीनेटर उपलब्ध हे। 2 अप्रैल 2021 के सर्वाधिक 3.26 लाख मनखे मन के अउ 3 अप्रैल 2021 के 2.92 लाख मनखे मन के टीकाकरण करे गइन।