- जांच के क्षमता बढ़ाय बर जरूरी मशीन अऊ नवा लैब के अनुमति प्रदान करे के करिन अनुरोध
- कोविड-19 ले निपटे छत्तीसगढ़ के व्यवस्था मन के दीन जानकारी
रायपुर. 11 अप्रैल 2020। स्वास्थ्य मंत्री श्री टी.एस. सिंहदेव काली केन्द्रीय स्वास्थ्य मंत्री डॉ. हर्ष वर्धन के वीडियो कॉन्फ्रेंसिंग म सामिल होइन। डॉ. हर्ष वर्धन सबो प्रदेश म कोविड-19 के नियंत्रण अउ रोकथाम के व्यवस्था के जानकारी लेवत रहिन। श्री सिंहदेव ह ओ मन ल ये संबंध म प्रदेश म करे गे व्यवस्था मन के बारे म परखर जानकारी दीन। उमन भारत सरकार ले जरूरत के मुताबिक संसाधन अऊ सामान उपलब्ध कराए के मांग करिन।
स्वास्थ्य मंत्री ह वीडियो कॉन्फ्रेंसिंग म डॉ. हर्ष वर्धन ल बताइन के छत्तीसगढ़ कोति ले भारत सरकार ले मांगे गए सामान के तुलना म बहुत कम समान के आपूर्ति होए हे। उमन प्रदेश के जरूरत के मुताबिक पीपीई, मास्क अउ आन संसाधन जल्दी मुहैया कराए के अनुरोध करिन। उमन एम्स रायपुर म कोरोना वायरस जांच के क्षमता बढ़ाय ऑटोमेटेड डीएनए-आरएनए एक्सट्रैक्शन सिसटम (Automated DNA-RNA Extraction Machine) संग आन जरूरी मशीन उपलब्ध कराए ल कहिन। एखर से उहां जांच के क्षमता दुगुना हो जाही। उमन रायपुर मेडिकल कॉलेज के संगेच अंबिकापुर अऊ रायगढ़ मेडिकल कॉलेज म घलोक एखर जांच के अनुमति प्रदान करे ल कहिन।
वीडियो कॉन्फ्रेंसिंग म केन्द्रीय स्वास्थ्य मंत्रालय कोति ले बताए गीस के छत्तीसगढ़ अऊ झारखंड म कोरोना वायरस टेस्ट बर नवा लैब मन के अनुमति एम्स रायपुर कोति ले देहे जाही।