ग्राम केसला म बनाए गए हे गर्भवती महिला मन बर क्वारेंटाईन सेंटर
बिलासपुर, 6 जून 2020। राज्य के बाहिर ले वापस अवइया प्रवासी मजदूर मन म गर्भवती महिला मन घलोक हे। ए महिला मन के देखभाल बर जिला के विकासखंड बिल्हा के ग्राम केसला म सामुदायिक स्वास्थ्य केन्द्र बिल्हा के अधीन अलग क्वारेंटाईन सेंटर बनाय गए हे। जिहां गर्भवती महिला मन के विशेष देखभाल के संगें-संग ओ मन ल स्वच्छता अऊ हाईजिन बर घलोक प्रेरित करे जात हे।
ग्राम केसला के क्वारेंटाईन सेंटर प्रदेश के पहला सेंटर ये, जिहां केवल अइसन प्रवासी मजदूर महिला मन रखे गए हे जऊन गर्भवती हें। अभी हाल म ये सेंटर म 8 महिला मन रूके हें। जिंकर बर चाक-चौबंद व्यवस्था करे गए हे। ये क्वारेंटाईन सेंटर म महिला डॉक्टर अउ स्टाफ नर्स सोसल डिस्टेंसिंग के संग मास्क, फेससील्ड पहिर के तैनात हें। जऊन जरूरत होए म ए महिला मन ल चिकित्सा सुविधा प्रदान करत हें।
सबो महिला मन के स्वास्थ्य जांच अऊ कोरोना जांच बर सैम्पल ले गए हे। ओ मन ल दू टाईम पौष्टिक भोजन, चाय, नाश्ता उपलब्ध कराए जात हे। संक्रमण ले दूर रखे बर क्वारेंटाईन सेंटर म 24 घंटा म तीन पइत साफ-सफाई कराए जाथे। इहां अवइया सबो महिला मन के कांटेक्ट हिस्ट्री अऊ ट्रेवल हिस्ट्री तियार करे जात हे, ताकि भविष्य म कोनो महिला कोरोना पॉजिटिव होही त ओ ल उचित इलाज मिल सकय अउ ऊंखर संपर्क म आये मनखे ल खोजे जा सकय।
क्वारेंटाईन सेंटर के प्रभारी डॉ.प्रिया रावत ह बताइस के गर्भवती माता मन ल मास्क के उपयोगिता अऊ गर्भ म पलत लइका मन के समुचित देखभाल बर अऊ अपन के देखभाल बर जरूरी सलाह देहे जात हे। ए महिला मन के टीकाकरण घलोक करे गए हे जेखर से ऊंखर अऊ गर्भस्थ शिशु ल बीमारी ले मुक्त रखे जा सकय। ये सेंटर म महिला मन खुसी-खुसी रहि के अपन क्वारेंटाईन अवधि पूरा करत हें ओ मन ल पता हे कि जरूरत परे म ओ मन ल जरूरी चिकित्सा अउ देखभाल मिल सकही।