प्रतिभावान दिव्यांग छात्रा राजेश्वरी ल मिलिस नयी व्हील चेयर

कोण्डागांव, कई मनखे अभाव अऊ अक्षमता ल जीत करके अपन जजआ अउ प्रतिभा ले इतिहास लिख जाथें। अइसनहे एक कहानी कोण्डागांव जिला के मसोरा के 13 वर्षीय बालिका राजेश्वरी पटेल के हे। राजेश्वरी जन्म ले ही अपन हाथ अउ पांव ल मोड़े मे असक्षम रहिस जेखर कारण वो बचपन ले ही चले फिरे म असमर्थ रहीस फेर ये असमर्थता ल ओ हर कभू अपन ऊपर हावी नइ होए दीस। मसोरा के माध्यमिक शाला म कक्षा सातवीं म अध्ययनरत राजेश्वरी अपन हाथ ले काम नइ कर पात रहिस। अइसन म ओ ह अपन पांव ले काम करना चालू कर दीस। आज वो पांव ले बांटी खेले, पेंटिंग बनाए अऊ रंगोली बनाए जइसे काम घलोक कर लेथे।
राजेश्वरी के पिता दीनूराम पटेल कहिथे कि ओ ल अपन बेटी उपर गरब हे। हाथ ले काम नइ कर पाय के बाद घलव पांव ले वो अपन सबो काम कर लेथे। राजेश्वरी रंगोली, पेंटिंग के अलावा अच्छा गा घलोक लेथे। बालिका राजेश्वरी कहिथे के ओ ल वोखर परिवार वाले के हमसा सहयोग मिले हे। ओ ल स्कूली शिक्षक अऊ सहपाठी मन कोति ले घलोक सहयोग अउ प्रोत्साहन मिलत हे।