मुख्यमंत्री ले सीधा बात, बने गे बात: गूगल ले नंबर खोज के सीएम ल लगईस फोन

रायपुर, गुगल ले मुख्यमंत्री श्री भूपेश बघेल के मोबाईल नंबर पता कर के सीधा बात करिस अऊ ओखर बात बन गे। ये सिरतोन म होइस बिलासपुर जिला के मस्तूरी ब्लाक के मुड़पार गांव के रहइया 25 बछर के दिव्यांग रवि कश्यप बर। मुख्यमंत्री ले बात करके अपन मांग रखे के दू दिन नइ बीते रहिस, के ओला मुख्यमंत्री के हाथ चमचमात ट्राईसइकिल के सौगात मिल गे। मुख्यमंत्री ह दिव्यांग रवि कश्यप ल बधाई अऊ शुभकामना घलोक दीस। दिव्यांग रवि ह मुख्यमंत्री श्री भूपेश बघेल के संवेदनशीलता बर उंखर आभार जताइस।
बात छोट कन हे, फेर ये साबित करे बर काफी हे के मुख्यमंत्री श्री भूपेश बघेल तक राज्य के आम जनता के पहुंच कतेक सहज हे। मुख्यमंत्री के संवेदनशीलता के अंदाजा ये बात ले लगाए जा सकत हे के अनजान नंबर ले कॉल आए म घलोक उमन न केवल फोन करइया के बात सुनिन, भलुक उंखर समस्या के निराकरण घलोक तुरते-ताही कर दीन।
दिव्यांग रवि कश्यप ह गूगल ले मुख्यमंत्री के नंबर खोज के ओ मन ल सनिवार के दिन सीधा फोन लगाके बात करे रहिस। दू दिन के भीतरेच रवि ल मुख्यमंत्री ह ट्राईसिकल दे दीस। ये चमत्कार के उम्मीद छत्तीसगढ़ राज्य म ही करे जा सकत हे, जिहां राज्य के मुखिया आम मनखे मन बर सहज उपलब्‍ध हे। आज बिलासपुर दउरा के बेरा म मुख्यमंत्री श्री बघेल ह सकरी हेलीपेड म दिव्यांग रवि ल ट्राईसिकल भेंट करिस।
रवि कश्यप के बताती मुख्यमंत्री श्री भूपेश बघेल के संवेदनशीलता के बारे म सुने रहेंव। गूगल ले ओखर नंबर खोज के राह तो लगथे के नहीं कई के मैं ह सीधा फोन कर देंव। फोन लग गे अऊ मुख्‍यमंत्रीच ह फोन उंचा लीस, श्री भूपेश बघेल ह इत्मीनान ले मोर पूरा बात सुनिन अऊ ट्राईसिकल के मोर मांग ल पूरा करे के भरोसा देवाईन। रवि ह आगू बताईस के ये मुख्यमंत्री के जनता बर मया ये, जेखर चलते ओ मन ह खुदे, दू दिन के भीतरेच ट्राईसिकल दे दीन। रवि के बताती छत्तीसगढ़ ही ह अइसे राज्य हे जिहां के मुखिया ले कोनो मनखे सीधा अपन बात रख सकत हें। श्री कश्यप ह बताइस के वोखर परिवार के आर्थिक स्थिति अच्छा नइ हे। पिता चुंगु राम कश्यप के आमदनी ले ही छै सदस्य के परिवार के गुजर-बसर होथे। रवि ल जब भूपेश दाऊ ह ट्राईसाइकिल दीन ते बेरा म संसदीय सचिव श्रीमती रश्मि सिंह, कलेक्टर डॉ. सारांश मित्तर घलोक मौजूद रहिन।