रायपुर, मुख्यमंत्री श्री भूपेश बघेल ले काली इहां ऊंखर निवास कार्यालय म तमिलनाडु के तंजावूर, तिवारूर अऊ नागपट्टनम जिला ले आए किसान मन ह सौजन्य मुलाकात करिन अऊ शाल अऊ नारियल के पौधा भेंट करके ओ मन ल सम्मानित करिन। किसान मन ह मुख्यमंत्री ले कहिन कि धान के 2500 रूपिया प्रति क्विंटल कीमत देके आप देशभर म किसान मन के नवा रोल मॉडल के रूप म उभरत हव। धान ले इथेनाल बनाए बर प्लांट लगे ले आपके कीर्ती देश-दुनिया म फैलही। उमन मुख्यमंत्री ले छत्तीसगढ़ म ग्रामीण अर्थव्यवस्था ल मजबूती दे बर सुराजी गांव योजना के तहत नरवा, गरवा, घुरवा अऊ बाड़ी कार्यक्रम के प्रसंशा करिन अऊ पारम्परिक खेती-किसानी के संबंध म किसान मन के बड़का सम्मेलन आयोजित कराए के घलोक आग्रह करिन, जेखर से देशभर के किसान अपन अनुभव साझा कर सकयं।
मुख्यमंत्री ले मुलाकात के समय किसान मन ह कहिन कि देशभर म आप मन पहिली मुख्यमंत्री हव, जेमन किसान मन ल अपन वादा के मुताबिक फसल के सही दाम देवाये के वादा पूरा करे हव। ए किसान मन ह कहिन कि आप मन खुद किसान हव ए खातिर किसान मन के दरद ल समझ थव। जन घोषणा पत्र म आप मन जऊन वादा करे रहेव, ओखर मुताबिक किसान मन ल 2500 रूपिया प्रति क्विंटल धान के कीमत देहे हव। देश के कई भाग म पहिली घलोक किसान मन ले ये प्रकार के वादा करे गए रहिस फेर वो वादा ल कभू पूरा नइ करे गीस।
मुख्यमंत्री ल किसान मन ह बताइन कि उमन रायपुर जिला के सारागांव धान खरीदी केन्द्र के आज भ्रमण करिन। जिहां उमन किसान मन ले घलोक बातचीत करिन। इहां धान खरीदी के पूरा व्यवस्था कम्प्यूटरीकृत हे। किसान मन ल तुरंत आनलाईन भुगतान करे जात हे। एखर अलावा पूरा व्यवस्था पारदर्शी हे। जबकि तमिलनाडु म 3 ले 15 दिन के समय लग जात हे अउ उहां दलाल मन ले घलोक किसान मन ल दिक्कत होथे। धान खरीदी केन्द्र म भ्रमण के समय पता चलिस कि धान के बने कीमत मिले के बाद बड़ अकन किसान धान बेचे आत हे। जबकि तमिलनाडु म कई पइत किसान मन ल व्यापारी मन ल धान बेचना पर जाथे।
तमिलनाडु ले आए किसान मुख्यमंत्री के सरलता अऊ सहजता ले बड़ प्रभावित होइन। ए किसान मन ह बताइन कि ऊंखर राज्य म मुख्यमंत्री ले मुलाकात अतका सरल नइ होवय। किसान मन ह बताइस कि जब छत्तीसगढ़ म किसान मन ल धान के कीमत 2500 रूपिया के घोषणा होए रहिस तब उमन मुख्यमंत्री श्री भूपेश बघेल के नाम म तावंजूर म किसान मन ल मिठाई बांटके खुसी जाहिर करे रहिन। मुलाकात के समय किसान मन ह बताइन कि आल इंडिया किसान संघर्ष के बैनर तले जब दिल्ली गे रहेन, तब सबो किसान मन 2500 रूपिया किसान मन ल धान के कीमत देहे के तारीफ करत रहिन।
मुख्यमंत्री ह किसान मन ल बताइन कि इहां धान ले इथेनाल बनाए के प्लांट लगाय जात हे। एखर टेंडर घलोक हो गए हे। दू किलो धान ले एक लीटर इथेनाल बनही। एखर से किसान मन ल धान के कीमत बनेच मिलही उन्हें विदेशी मुद्रा के घलोक बचत होही। उमन कहिन कि इथेनाल बनाए ले धान के संग्रहण बर गोदाम के घलोक जरूरत नइ परय। किसान मन ह ये म प्रसन्नता जाहिर करत कहिन कि इथेनाल प्लांट लगे ले छत्तीसगढ़ के मुख्यमंत्री पूरा देशभर के किसान मन बर नवा रोल मॉडल बनके उभरहीं। मुख्यमंत्री ह खनिज विभाग के सचिव श्री अंबलगन पी. ल तमिलनाडु ले आए ए किसान मन ल गौठान देखाय अऊ आर्गेनिक फार्म के भ्रमण कराए के घलोक निर्देश दीन।
चर्चा के समय किसान मन ह बताइन कि कावेरी-डेल्टा के आसपास गन्ना के घलोक बने फसल होथे। कई पइत गन्ना खरीदी म देरी होए ले किसान मन ल कई प्रकार के समस्या के सामना करना परथे। ये म मुख्यमंत्री ह कहिन कि गन्ना ले इथेनाल बनाए के काम घलोक करे जा सकत हे। पेट्रोल म 20 प्रतिशत बायोफ्यूल मिलाय जा सकत हे। अभी हाल म 6 प्रतिशत बायोफ्यूल मिलाय जात हे। ये मां 14 प्रतिशत के गैप एखर पूर्ति बायोफ्यूल ले करे जा सकत हे।
ये बेरा म तंजावूर, तिवारूर अऊ नागपट्टनम के अध्यक्ष श्री चेयरन, कावेरी किसान संघ के सचिव श्री विमलनाथन, कुंभकोडम तहसील इकाई के श्री खलियापेरमाल अऊ श्री स्वामीनाथन नागपट्टनम के श्री सरगोपन, तिरूवारूर के श्री आर.एस. बालाजी अऊ तंजावूर के श्री विश्वनाथन उपस्थित रहिन।
