गृह मंत्री बठेना पहुंचके एके परिवार के पांच मनखे मन के मृत्यु के घटना के जायजा लीन अऊ अधिकारी मन ल गंभीरता ले जांच के दीन निर्देश

रायपुर, 8 मार्च 2021। गृहमंत्री ताम्रध्वज साहू आज भिनसरहा दुर्ग जिला के पाटन थाना क्षेत्र के ग्राम बठेना पहुंचके एके परिवार के पांच मनखे मन के मृत्यु के घटना के जायजा लीन अऊ पुलिस विभाग के वरिष्ठ अधिकारी मन ल गंभीरता ले घटना के जांच के निर्देश दीन। मंत्री श्री साहू ह घटना वाले मकान के कमरा ले लेके जले पैरावट तक के निरीक्षण करिन। ये दौरान ऊंखर संग पुलिस अधीक्षक दुर्ग श्री प्रशांत ठाकुर संग आन अधिकारी घलोक मौजूद रहिन। उमन इंटेलिजेंस टीम बनाके घटना के जांच के आदेश दीन। ये संबंध म आई.जी. इंटेलिजेंस ले घलोक बात करे हें। गृहमंत्री ह एक-एक स्पॉट ल ध्यान से देखिन अऊ ये संबंध म अधिकारी मन ले बात करिन। उमन जेन मकान म परिवार रहत रहिस, ओखर पूरा जायजा लीन। फेर घटना ल लेके गंभीरता ले जांच करे के निर्देश अधिकारी मन ल दीन अऊ जल्दी से जल्दी कार्रवाई करे बर कहिन।