रायपुर GG Digital News Desk, छत्तीसगढ़ सरकार ह सरकारी काम-काज ला आसान अउ तेज बनाए बर एक ठन बड़का फैसला लेहे हे. अब सरकारी आदेश या अधिसूचना (नोटिफिकेशन) बर फाइल मन ला इहाँ-उहाँ भेजे के जरूरत नइ परय. राजस्व मंत्री श्री टंकराम वर्मा ह आज मंत्रालय मा ‘ई-गजट ऑनलाईन पोर्टल’ के सुभारंभ करिन.
का होही एखर ले फायदा?
पहिली का होत रिहिस, जब भी कउनो सरकारी नियम या आदेश (राजपत्र) छापे ला रहय, त फाइल ला एक ऑफिस ले मुद्रणालय तक भेजे मा ही कई दिन लग जावत रिहिस. एमा कागज घलो भारी खर्चा होवय अउ समय घलो.
फेर अब ए नवा पोर्टल के आए ले:
1. सब काम ऑनलाइन: कउनो भी विभाग या कलेक्टर ऑफिस सिध्धे कंप्यूटर ले आदेश अपलोड कर सकही.
2. चट पट काम: जइसे आदेश अपलोड होही, वो तुरते ऑनलाइन ‘ई-गजट’ के रूप मा छप जाही. काम मा देरी नइ होवय.
3. कागज के बचत: अब काम-काज ‘पेपर-लेस’ होही, जेखर ले कागज के बचत होही अउ पर्यावरण सुरच्छित रही.
4. सबला मिलही जानकारी: आम जनता हो या कर्मचारी, अब कोनो भी राजपत्र ला ऑनलाइन देख सकही अउ डाउनलोड कर सकहीं.
सरकार के कहना हे के मुख्यमंत्री विष्णु देव साय के सासन मा अब काम मा पारदर्शिता आही अउ जनता ला सरकारी फैसला के जानकारी बर इहाँ-उहाँ भटके ला नइ परय. ये डिजिटल जमाना मा एक ठन बहुत जरूरी कदम हरे.
