निर्माण एजेंसी मन के काम करे के तरीका उपर कलेक्टर बगियाईस
ये जिला ल अपन घर अऊ मनखे मन ल अपन परिवार माने के दीन सलाह
जांजगीर-चाम्पा, जिला के अधिकांश सड़क मन के हालत खराब हे। जगा-जगा गड्ढा हो गे हे। दुर्घटना के संभावना बाढ़ गए हे। बरसात आ गए हे। अभी गड्ढा नइ भराही त कब भरहू? तूं मन टेंडर बर पहिली काबर नइ भेजेव? ये सब आप मन के विभागीय काम ये। काम म लापरवाही दिखत हे। न बैठक लेवत हव अऊ न काम करा पात हव अऊ न खुद बने सहिन काम करत हव। अइसे बिल्कुल नइ चलय। माननीय मुख्यमंत्री, मंत्री, राज्य सरकार ले लेके उच्च अधिकारी मन के घलोक निर्देश हे कि सबो प्रमुख सड़क मन म गड्ढ़ा नइ रहना चाही। तभो तुं मन काम नइ कर पात हव। तूं मन पहिली ले प्रस्ताव घलोक नइ बनाय हव। अब मैं कुछ नइ सुनव। 10 अगस्त ले सड़क मन के गड्डा भरे के काम चालू हो जाना चाही अऊ मोला काम होत फ़ोटो घलोक भेजव।
कलेक्टर श्री तारन प्रकाश सिन्हा ह काली निर्माण एजेंसी मन के अधिकारी मन के बैठक लेके विभागीय काम मन के समीक्षा करिन। सड़क, सरकारी भवन संग आन निर्माण काम मन के प्रगति ल देखके कलेक्टर ह लोक निर्माण, ग्रामीण यांत्रिकी सेवा, हाऊसिंग बोर्ड, जल संसाधन, प्रधानमंत्री सड़क योजना संग नेशनल हाइवे के अधिकारी मन उपर जोरदरहा बगियाईन। अपन अधीनस्थ अधिकारी मन के बैठक नइ लेहे अऊ काम मन के समीक्षा नइ होए के बात कहत कलेक्टर ह सख्त चेतावनी देहे हें कि कहूं जल्दी काम मन म सुधार नइ लाए गीस त ओ मन उच्च अधिकारी मन ल जरूरी कार्यवाही बर सूचित करहीं।