जांजगीर-चांपा, मुख्यमंत्री श्री भूपेश बघेल काली एक दिन के जांजगीर-चाम्पा जिला के शिवरीनारायण दउरा म गए रहिन। ये बेरा म उमन माता शबरी अऊ भगवान नर नारायण के दर्शन करके मंदिर म पूजा करिन अऊ कन्नौजिया कुर्मी समाज के धर्मशाला के लोकार्पण करिन। इहां आयोजित सामाजिक सभा ल संबोधित करत मुख्यमंत्री श्री बघेल ह कहिन कि प्रदेश के विकास म सबो समाज के सहभागिता जरूरी हे। उंखर सरकार सबो समाज अऊ वर्ग ल संग लेके विकास के रद्दा म आगू बढ़त हे। शिक्षा, स्वास्थ्य अऊ रोजगार के दिशा म जेन योजना बनाय गए हे, ओखर से सबो समाज के गरीब अऊ जरूरतमंद मनखे मन के उत्थान होवत हे। मुख्यमंत्री ह कहिन कि छत्तीसगढ़ के अपन गौरवशाली संस्कृति हे। ए मन ल संरक्षित करे के संग अवइया पीढ़ी ल बताय के दिशा म घलोक सरकार काम करत हे।
मुख्यमंत्री श्री बघेल ह मंच ले कहिन कि अवइया समय म जिला के विकास अऊ तेजी ले होही। आप मन के जिला म नवा कलेक्टर आ गे हे। लकठा परोस के रहइया हे, बिलासपुर के ये, अच्छा काम करही। इहां के जिला पंचायत सीईओ रहे हे, अब सरलग विकास होही। उमन कहिन कि राजनांदगांव म कलेक्टर होए के पहिली श्री तारन प्रकाश सिन्हा, जनसंपर्क के आयुक्त सह संचालक रहिन। अब आप मन के जिला के कलेक्टर बन गए हें।
