रायपुर, टीबी अऊ कुपोषण मुक्ति के लड़ई अब संगें-संग लड़े जात हे। एखर से मुख्यमंत्री सुपोषण अभियान ल अकतहा बल मिलत हे। कबीरधाम जिला ह स्वास्थ्य अऊ पोषण सुरक्षा बर मुख्यमंत्री सुपोषण योजना अऊ मुख्यमंत्री हाटबाजार क्लीनिक योजना के शुभारंभ के पहिलिच कुपोषण मुक्ति अऊ स्वास्थ्य सुरक्षा बर अपन लड़ई तेज कर देहे हे अऊ कई ठन नवाचार के माध्यम ले ए दिशा म उदीम म लग गए हे। इही कड़ी म कवर्धा जिला म ए साल अगस्त महिना ले सबो जरूरी पोषक तत्व मन के समावेश करके कुपोषित लइका मन ल सुपोषित करे बर फूड बास्केट देहे जात हे। एखरे संगेच कुपोषित अऊ टीबी ले ग्रसित 60 लइका मन ल फूड बास्केट म अलग ले प्रोटीन पाउडर बांटे जात हे।
प्रोटीन लइका मन के शारीरिक अऊ मानसिक विकास बर बहुत जरूरी होथे। खासकर टीबी बीमारी के चलते लइका मन कमजोर हो जाथें। टीबी ले पीड़ित लइका मन के विकास बर पोषक तत्व मन के जरूरत होथे। एला देखत कवर्धा जिला क्षय नियंत्रण कार्यक्रम के अंतर्गत आन पोषक तत्व मन के संगेच जिला के टीबी ले ग्रसित म 0-14 साल के लइका मन ल प्रोटीन पाउडर देहे जात हे। पाछू बछर जिला म 663 टीबी के मरीज चिन्हारी होए रहिस उहें ए साल जनवरी 2019 ले अगस्त 2019 के बीच कुल 493 टीबी के मरीज पाए गे हे। एमां 60 लइका सामिल हे। जिंकर उपचार अऊ देखरेख जिला क्षय नियंत्रण कार्यक्रम के तहत होवत हे। शासन के उदीम ले मरीज मन के संख्या म कमी आए हे। ए दिशा म तेजी ले काम करत टीबी अऊ कुपोषण ले मुक्ति के उदीम करे जात हे। जिला क्षय नियंत्रण समिति कोति ले टीबी ले बचाव अऊ जन जागरूकता बर एक खास प्रकार के बैग घलोक तियार करे गए हे। बैग ले ‘चाहिए नेतृत्व अपार, टीबी मुक्त हो संसार‘ स्लोगन के सहारा ले टीबी बीमारी के लक्षण अऊ बचाव के बारे म जानकारी देहे जात हे।
