मुख्यमंत्री ह जशपुर के सरना एथनिक रिसार्ट के तीर करिस समेकित चाय रोपण के भूमिपूजन: रोपिन चाय के पौधा
रायपुर, 05 दिसम्बर 2020। मुख्यमंत्री श्री भूपेश बघेल ह आज जशपुर जिला के ग्राम पंचायत बालाछापर स्थित सरना एथनिक रिसॉर्ट के बगल म समेकित चाय रोपण के भूमि पूजन करिन अऊ मंत्री, विधायक अऊ अधिकारी मन के संग चाय के पौधा रोपिन। उमन एखर पहिली सरना एथनिक रिसोर्ट परिसर म वृक्षारोपण तको करिन। एथेनिक रिसॉर्ट के बगल म करीबन 7 एकड़ म चाय के रोपण वन विभाग, डीएमएफ अऊ मनरेगा के माध्यम ले करे जात हे, जेमां 6 हजार 300 पौधा के रोपण करे जाही। चाय के पौधा करीबन 2 ले ढाई साल म तियार हो जाथे अऊ 5 वां साल ले पत्ती के नियमित तोड़ाई करे जाथे।
मुख्यमंत्री ह ये बेरा म कहिन के जशपुर ल चाय बागान बर घलोक जाने जाथे। चाय के खेती सही म एक फायदेमंद खेती हे, एला बढ़ावा देहे ले इहां बहुत अकन किसान मन ल अड़बड़ फायदा होही। उमन वन विभाग के अधिकारी मन ल हुकुम दीन के चाय के खेती बर किसान मन के समूह बनावयं अऊ ओ मन ल पंदोली देवयं। मार्केटिंग बर बेहतर उपाय करयं।
ये बेरा म मुख्यमंत्री ह चाय के खेती करइया किसान श्री महेंद्र भगत, श्री करमु राम अऊ श्रीमती इतवारी भगत ले मुलाकात करके ओ मन ल चाय के खेती अपनाए बर बधाई दीन अऊ आस- पड़ोस के किसान मन ल घलोक चाय के खेती बर आगू लाय के बात कहिन। मुख्यमंत्री ह चाय पौध रोपण काम म लगे मजदूर मन ले पारिश्रमिक के राशि अऊ नियमित भुगतान के बारे म पूछ ताछ करिन। ये बेरा म खाद्य मंत्री अऊ जिला के प्रभारी श्री अमरजीत भगत, संसदीय सचिव अऊ सामरी विधायक श्री चिंतामणी महाराज, जशपुर विधायक श्री विनय भगत, कमिश्नर सुश्री जी. किंडो, पुलिस महानिरीक्षक श्री रतन लाल डांगी, कलेक्टर श्री महादेव कावरे, पुलिस अधीक्षक श्री बालाजी राव संग स्थानीय जनप्रतिधि अऊ अधिकारी उपस्थित रहिन।