रायपुर, 19 अगस्त 2020। मुख्यमंत्री श्री भूपेश बघेल काली तीजा-पोरा तिहार म छत्तीसगढ़ी लोक कलाकार मन के संग झुमरिन अऊ छत्तीसगढ़ी जसगीत के लय म ढोलक म थाप घलोक दीन।
मुख्यमंत्री निवास म काली तीजा-पोरा तिहार के आयोजित कार्यक्रम म छत्तीसगढ़ी गीत मन के आकर्षक प्रस्तुति श्री दिलीप षडंगी अऊ साथी मन ह दीन। कार्यक्रम म महिला मन के उछाह देखतेच बनत रहिस। मुख्यमंत्री घलोक अपन आप ल ये खुशी के मौका म रोक नइ पाइन। उमन कलाकार मन के हौसला बढ़ाए बर ऊंखर संग जसगीत के लय म ढोलक म थाप दीन अऊ गीत के लय म कलाकार मन के संग झुमरिन। ये बेरा म उंखर संग महिला अऊ बाल विकास मंत्री श्रीमती अनिला भेंड़िया, विधायक श्री मोहन मरकाम, छत्तीसगढ़ राज्य खनिज विकास निगम के अध्यक्ष श्री गिरीश देवांगन, महिला आयोग के अध्यक्ष श्रीमती किरणमयी नायक, रायपुर नगर निगम के महापौर श्री ऐजाज ढेबर ह घलोक रहिन।
जानबा हे के मुख्यमंत्री निवास म पऊर साल ले छत्तीसगढ़ी परब ल मनाए के शुरूआत करे गए हे। मुख्यमंत्री निवास म प्रदेश के कई जगा ले बहिनी मन ल तीजा-पोरा परब बर नेऊते गए रहिस। ऊंखर बर मुख्यमंत्री निवास म विशेष व्यवस्था करे गए रहिस। महिला मन ल मुख्यमंत्री कोति ले लुगरा अऊ छत्तीसगढ़ी व्यंजन के उपहार दे गीस।