तहसीलदार ह खुदे मजदूर मन बर बनाइस खिचरी
जांजगीर-चांपा, 27 अपरेल,2020। कलेक्टर श्री जनक प्रसाद पाठक के हुकुम म कोविड-19 के संक्रमण रोके लागू लाकडाऊन प्रभावित मन के हर संभव मदद करके ओ मन ल राहत पहुंचाए के कार्रवाई करे जात हे। काल देर रात रायपुर ले राहत शिविर जांजगीर पहुंचे मजदूर मन बर एसडीएम जांजगीर श्रीमती मेनका प्रधान अऊ तहसीलदार जांजगीर ह सबो श्रमिक मन बर भोजन अऊ घर के व्यवस्था करिन। एस डी एम जांजगीर ह बताइस के काल बलौदाबाजार जिला ले 22 श्रमिक जऊन जांजगीर जिला के कई ब्लॉक के रहइया यें, ओ मन ल बलौदा बाजार ले 10 बजे जांजगीर बर रवाना करे गीस। रायपुर स्थित शिविर ले जांजगीर चांपा अउ रायगढ़ के 8 मजदूर काल रात करीब एक बजे जांजगीर पहुचिन। ये सबो मनखे भोजन नइ करे रहिन, भूखे रहिन, जांजगीर पहुंचे म बहुत तेज बारिश अऊ आंधी तूफान आए रहिस। सूचना मिलतेच एसडीएम जांजगीर अऊ तहसीलदार जांजगीर राहत शिविर पहुंचिन। सबो बर उमन खुदे खिचरी बनवाइन। तहसीलदार ह खुद अपन हाथ ले खिचरी बनाके सबो ल खवाइन। भोजन करे के बाद आराम करे के व्यवस्था करे गीस। आज सबो श्रमिक मन के स्वास्थ्य के परीक्षण करे जाही। सबो ल ऊंखर गृह ग्राम भेजे के कार्रवाई करे जाही।
एकर संगेच बीजापुर ले नवागढ़ पहुंचे 15 मजदूर मन के घलव स्वास्थ्य परीक्षण कराए गीस। समुदायिक स्वास्थ्य केन्द्र नवागढ़ म 6 परिवार के 19 सदस्य मन के स्वास्थ्य परीक्षण कराए गीस। सबो के स्वास्थ्य सामान्य होना पाए गीस। सबो परिवार ल नवागढ़ अनाज बैंक ले सूखा अनाज, राशन सामान देहे गीस। सबो सदस्य मन ल इकंर गृह गाम कटौद, पचरी, बरभाटा सकुशल पहुंचाए गीस।