तेलंगाना के सीमा ले लगे बीजापुर के पामेड़ ईलाका जगमगाइस

बीजापुर, तेलंगाना के सीमा ले लगे पामेड़ ईलाका 15 साल बाद फेर जगमगा उठे हे। मुख्यमंत्री श्री भूपेश बघेल के विशेष पहल म इहां नवा विद्युत लाईन पहुंचाए गए हे। एखर से ये ईलाका म जन-जीवन फेर दमक उठे हे। संझा होतेच अब घर म घुसर जवईया गांव मन ब गांव के गली अऊ चौंक मन म रात तक चहल-पहल बने रहिथे। पामेड़ ईलाका म बिजली पहुंचे म इहां के मनखे मन के मन के भय अऊ जीवन के अंधेरा दूर हो गए हे। घर मन म लइका मन बलब के उंजोर म अब देर रात तक पढ़ाई करत दिखत हें। किसान बिजली मिले ले अब पम्प के संग अपन खेत मन के प्यास बुझाए अऊ बेहतर खेती करे लगे हे।
मुख्यमंत्री श्री भूपेश बघेल के हुकुम के मुताबिक बीजापुर जिला म मुख्यमंत्री मजरा-टोला ग्रामीण विद्युतीकरण योजना के तहत 111 गांव मन म बिजली पहुंचाए के काम तेजी ले करे जात हे। 105 गांव मन के मजरा-पारा-टोला मन तक बिजली पहुंचाए के काम पूरा कर ले गए हे, जेमां पड़ोसी राज्य तेलंगाना के सीमा म स्थित पामेड़ के ईलाका घलोक सामिल हे। पामेड़ के ये ईलाका 15 साल बाद फेर रोशनी ले जगमग होय हे, जेकर चमक गांव वाले मन के चेहरा पे साफ दिखत हे।