गांव के रहइया शांति अब हे लखपति, दूए साल म कमाइस साढ़े चार लाख रूपिया

जगदलपुर, दू साल पहिली तक बस्तर ब्लाक के दुरा गांव के रहवइया शांति कश्यप चिंता म रहिस के वो अपन घर के खराब आर्थिक स्थिति ल कइसे ठीक करही। शांति ह ये तो जानत रहिस कि आस पास के जंगल म मिलइया वनोपज ले आर्थिक लाभ कमाए जा सकत हे, फेर कइसे कमाए जा सकत हे ये वोला नइ पता रहिस। अइसन म शांति ल वन धन योजना के सहारा मिलीस अऊ शांति ह अपन जइसे कुछ महिला मन ल संग जोड़के तेलगिन माता महिला स्व सहायता समूह खड़ा कर दीस। शांति अऊ ओखर समूह के महिला मन अब महुआ बीज अऊ करंज तेल ल समर्थन मूल्य म खरीदथें अऊ अपन प्रसंस्करण केंद्र के माध्यम ले ये एकर तेल निकालके बाजार म बेचथें।
महुआ बीज के तेल दीया जलाए के काम आथे जबकि करंज के तेल औषधि के रूप म उपयोग करे जाथे। तेलगिन माता महिला स्व सहायता समूह के ये प्रोडक्ट क्षेत्र म काफी प्रसिद्ध हे अऊ एखर मांग घलोक दिन ब दिन बाढ़त जात हे। इही बात हे के दू बछर के भीतर शांति अऊ समूह के महिला सदस्य मन ह साढ़े चार लाख रूपिया के मुनाफा कमाए हें। बाजार म बाढ़त मांग अऊ शासन कोति ले 65 लघु वनोपज के समर्थन मूल्य अऊ वन धन योजना के संघरा होए ले शांति अपन उत्पादन ल बढ़ावत हे अऊ अवइया समे म अपन समूह ल घलोक बड़का करे के विचार रखथे। एखर बर शांति कश्यप ह अमली ले जुड़े उत्पाद मन के प्रसंस्करण के काम घलोक शुरू कर देहे हे।