राजनांदगांव, 12 जून 2020। प्रकृति के अनुपम उपहार तेन्दू पत्ता वन वासी मन के अजिवीका के महत्वपूर्ण साधन हे। अब तेन्दू पत्ता तोड़ाई के काम पूरा हो गए हे। छत्तीसगढ़ शासन कोति ले तेन्दू पत्ता संग्राहक मन ल समृद्ध अऊ खुशहाल बनाए बर उंखर से चार हजार रूपिया प्रतिमानक बोरा के दर ले तेन्दू पत्ता खरीदे गए हे। संग्राहक मन ल बढ़े दर म अब जादा पारिश्रमिक के राशि मिलत हे, जेखर से ऊंखर परिवार म उछाह अउ प्रसन्नता हे।
राजनांदगांव जिला म सघन वन तेन्दू पत्ता ले समृद्ध हे, उहां के वनवासी तेन्दू पत्ता संग्रहण के काम अपन परिवार के संग जुर मिल के करथें। वन विभाग ह ओ मन ल बने गुणवत्ता के तेन्दूपत्ता लाय के बर सरलग पंदोली देवत रहिथे। सरईपतेरा के श्रीमती संवरी के बताती तेन्दू के पाना ले हमर जिनगी के खाना-दाना चलथे, अऊ एखर ले हमन ल रोजी-रोटी मिलथे। श्रीमती हिमानी ह कहिस के छत्तीसगढ़ शासन ह तेन्दूपत्ता खरीदे ले हमला फायदा होए हे अऊ जीविकोपार्जन म आसानी होए हे। लॉकडाउन के समय वन विभाग ह तेन्दूपत्ता संग्राहक मन ल मास्क के घलोक वितरण करे हे। तेन्दूपत्ता फड़ मन म वनवासी मन ल सोशल डिस्टेसिंग के पालन करे बर जागरूक तको करे गए हे।
संग्रहण केन्द्र मन म 100-100 के गड्डी ल चट्टा के रूप म बनाए जात हे अऊ पत्ता सुखाए के काम करे जात हे। बोरी म तेन्दूपत्ता भरके गोदाम म परिवहन के काम जारी हे। जिला के 75 संग्रहण केन्द्र मन म 3 लाख 13 हजार 644 तेन्दूपत्ता संग्राहक मन ले करीबन 87 हजार 870 मानक बोरा तेन्दूपत्ता संग्रहित करे गए हे। तेन्दूपत्ता संग्रहाक मन ल 10 करोड़ 76 लाख 93 हजार 421 रूपिया के भुगतान करे गए हे।
