तेन्दूपत्ता संग्रहण : कोरोना संकट के घड़ी म घलव होइस सरलग कमई

रायपुर, छत्तीसगढ़ म चालू साल 2021 के बेरा म तेन्दूपत्ता संग्रहण सीजन म 522 करोड़ रूपिया ले जादा के राशि के 13 लाख 5 हजार 710 मानक बोरा तेन्दूपत्ता के संग्रहण करे गए हे। ये बेरा म तेन्दूपत्ता संग्रहण करइया जम्‍मो 12 लाख 14 हजार 372 संग्राहक मन ल 522 करोड़ रूपिया के राशि के शत-प्रतिशत भुगतान कर देहे गए हे।
जानबा हे कि मुख्यमंत्री श्री भूपेश बघेल के मंशा के मुताबिक राज्य सरकार कोति ले वनवासी मन के हित म लेहे गए अहम फेसला के फलस्वरूप राज्य म तेन्दूपत्ता संग्राहक मन ल एमां ले केवल 2 महिना मई अऊ जून म ही 502 करोड़ 49 लाख रूपिया के राशि के भुगतान हो गए रहिस। वन अउ जलवायु बदलाव मंत्री श्री मोहम्मद अकबर ह बताइस कि एखर से राज्य के आदिवासी-वनवासी संग तेन्दूपत्ता संग्राहक मन ल कोरोना संकट के विषम हालत म रोजी-रोटी के कोनो समस्या नइ आइस अऊ ओ मन ल तेन्दूपत्ता के संग्रहण ले बहुत बड़ सहारा मिलीस। अइसनहे सबो वनवासी संग तेन्दूपत्ता संग्राहक मन के जिन्दगी म कोरोना संकट के घड़ी म घलोक आय के झड़ी लगे रहिस।