हितग्राही सीताराम भारती ल मुख्यमंत्री के हाथ मिलीस दू लाख रुपिया के चेक

तेंदूपत्ता संग्राहक बीमा सुरक्षा योजना
भारती बोलिस- लइका मन के पढ़ई लिखई अऊ पक्का घर के सपना होही पूरा

बस्‍तर, 13 मार्च 2024। जिला के बकावंड ब्लॉक ले जंगल जतरा कार्यक्रम म पहुंचे ग्राम कोहकापाल के किसान श्री सीताराम भारती अड़बड़ खुश हे काबर के ओ ल काली मुख्यमंत्री श्री विष्णुदेव साय के हाथ दू लाख रुपिया के चेक मिलीस।
भारती ह बताइस कि तेंदूपत्ता संग्राहक बीमा सुरक्षा योजना के तहत ओ ल ये राशि दे गीस। श्री भारती ह भावुक होके बताइस कि वोखर पत्नी श्रीमती कमला बाई भारती तेंदूपत्ता संग्राहक रहिस। साल भर पहिली वो चेचक अऊ पीलिया के बीमारी ले गंभीर रूप ले ग्रसित हो गीस अउ इलाज के बेरा म 23 जुलाई 2023 के वो परलोक सिधार गइस। एखर से ओखर पूरा परिवार बिखर गीस।
भारती ह बताइस कि उही सुरक्षा बीमा योजना के तहत आज ओ ला दू लाख रुपिया के चेक मिलिस। एखर से अपन लइका मन ल उच्‍च शिक्षा देवाए अऊ पक्का घर के सपना साकार करे म मदद मिलही। चेक मिले म भारती ह प्रदेश के मुख्यमंत्री श्री विष्णु देव साय के प्रति आभार व्यक्त करीस।