सीमावर्ती क्षेत्र मन म अवैध तेन्दूपत्ता के धर-पकड़ तेज
रायपुर, राज्य म तेन्दूपत्ता संग्रहण के काम सबो जिला मन म तेजी ले चलत हे अऊ 23 मई 2019 तक संग्रहण लक्ष्य के लगभग 70 प्रतिशत लक्ष्य प्राप्त करके 13 लाख 50 हजार मानक बोरा के संग्रहण कर ले गए हे। अभी तक 580 लाट म लगभग 90 प्रतिशत लक्ष्य पूरा करत आठ लाख 75 हजार मानक बोरा संग्रहित करे गए हे। अइसनहे अविकित 374 लाट म पांच लाख मानक बोरा संग्रहित करे गए हे। ए साल तेन्दूपत्ता के दर म बहुत वृबढ़ोतरी होए के सेती उत्साहपूर्वक गांव वाले मन तेन्दूपत्ता के संग्रहण करे जात हे। तेन्दूपत्ता संग्रहण के दर 2500 रूपिया ले 4000 हजार रूपिया प्रति मानक बोरा होए के सेती कई जिला मन म नवा संग्राहक मन संग्राहक कार्ड बनवाए हें। लगभग 8 ले 10 हजार अकतहा संग्राहक कार्ड जिला मन म जारी करे गए हे, जेखर से ये स्पष्ट हे के जादा ले जादा मनखे तेन्दूपत्ता संग्रहण के काम म जुटे हें।
जहां एक कोति बस्तर के जनजातीय इलाका मन म अऊ राज्य के आन क्षेत्र मन म लउहे अऊ बहुत उछाह ले तेन्दूपत्ता के संग्रहण प्रगति म हे। उन्हें दुसर कोति छेंव इलाका मन म तेन्दूपत्ता के अवैध आवक के धर-पकड़ जोर म हे, प्रधान मुख्य वन संरक्षक अऊ प्रबंध संचालक श्री राकेश चतुर्वेदी ह ए संबंध म बैठक लेके अऊ वीडियो कॉन्फ्रेंसिंग के माध्यम ले घलोक सबो वनमंडल अधिकारी मन ल बेरा ले पहिलिच सचेत कर देहे रहिन। ए सेती सबो जिला मन म जिहां छत्तीसगढ़ राज्य के सीमा आन राज्य मन ले मिलथे उहां रात्रि गश्त लगाके के रखवारी करे जात हे।
17 अऊ 18 मई 2019 के दरम्यानी रात बलरामपुर जिला के रघुनाथपुर रेंज म उत्तरप्रदेश के सीमा ले लगे क्षेत्र म उत्तरप्रदेश ले अवैध रूप ले राज्य म तेन्दूपत्ता लात 25 ले जादा मनखे मन ल पकड़े गीस अऊ 10 ले जादा फटफटी जप्त करे गीस। दिनांक 21 मई 2019 के दिन बलरामपुर जिला के धमनी रेंज के तारकेश्वर फड़ तिर उत्तरप्रदेश ले टाटा मैजिक ले 52 हजार गड्डि तेंदूपत्ता अवैध रूप ले परिवहन करत पकड़े गीस। जेकर कीमत दू लाख रूपिया ले घलोक जादा हे। अइसनहे बलरामपुर जिला के बलरामपुर रेंज के रामनगर कला गांव तीर झारखण्ड सीमा म कन्हर नदी तीर अवैध रूप ले तेन्दूपत्ता झारखण्ड ले छत्तीसगढ़ लात 5 फटफटी जप्त करे गीस। ए सबो प्रकरण मन म नियमानुसार कार्यवाही करे जात हे। वनमंडलाधिकारी बलरामपुर श्री विवेकानंद झा अऊ आन अधिकारी मन के संग तेन्दूपत्ता के अवैध परिवहन ल रोके बर सरलग रात म गश्त करे जात हे।
राज्य म तेन्दूपत्ता संग्रहण अब खतम होवईया हे अऊ अवइया एक हफ्ता के भीतर संग्रहण के काम पूरा होए संभावना हे। संगे संग उपचारण अऊ परिवहन के काम घलोक प्रगति म हे। प्रबंध संचालक राज्य लघु वनोपज संघ श्री राकेश चतुर्वेदी ह सबो वनमंडल अधिकारी मन ल निर्देश देहे गए हे के परिवहन अऊ गोदामीकरण के बेरा म तेन्दूपत्ता ल कोनो प्रकार के नुकसान ले बचाय के भरपूर उदीम करे जाए, ताकि अविकित तेन्दूपत्ता के जादा ले जादा कीमत मिल सकय।
