लइकई म अपन टेंगना मछरी धरई ल सुरता करत मुख्यमंत्री ह मंत्री मन के संग करिन केनापारा जलाशय म बोटिंग

रायपुर, मुख्यमंत्री श्री भूपेश बघेल ह आज सूरजपुर जिला के ग्राम पंचायत केनापारा स्थित केनापारा पर्यटन स्थल म स्कूल शिक्षा अऊ आदिमजाति कल्याण मंत्री डॉ प्रेमसाय सिंह टेकाम, खाद्य नागरिक आपूर्ति अऊ उपभोक्ता सरंक्षण मंत्री श्री अमरजीत भगत अऊ उच्चशिक्षा मंत्री श्री उमेश पटेल के संग करीब 600 मीटर तक बोटिंग के आनंद लीन।
उमन जलाश्य के बीच म जिला प्रशासन कोति ले मत्स्य पालन बर विकसित करे गए केज कल्चर के अवलोकन करिन अऊ अधिकारी मन ले मछली पालन के केज कल्चर पद्धति के बारे म जानकारी लीन। अधिकारी मन ह बताइन कि केज कल्चर म इहॉ पंगेशियस प्रजाति के मछली के पालन करे जात हे। इहॉ 32 केज स्थापित करे गए हे अभी मछली मन के वजन 1 किलो हे। मुख्यमंत्री ह मछली के अवलोकन करत कहिन कि पंगेशियस प्रजाति के ये मछली ल छत्तीसगढ़ी म ‘‘टेंगना‘‘ कहिथें। ये मछली पकड़े म कांटा मारथे जेखर से तेज दरद होथे। उमन अपन बचपन के दिन के सुरता करत कहिन कि गांव के खेत अऊ नरवा मन म टेंगना, मोंगरी अऊ केवच बिकट पकड़त रहेन। मुख्यमंत्री ह अधिकारी मन ले कहिन कि मछली पालन करइया समूह ल स्वरोजगार ले जेाड़े बर शासन के योजना मन के पूरा लाभ देवावव। ओ मन ल मछली पालन बर जरूरी प्रशिक्षण देके कुशल बनावव।