धमतरी, मुस्काता, खिलखिलात मासूम चेहरा काला नइ भाय??? अऊ मां बाप बर तो लइका के मुस्कान, ओखर खुशी अऊ तरक्की ही सब कुछ होथे। मगर ओही लइका कहूं तकलीफ म होवय त ओखर परेशान अऊ दुखी होना लाज़मी हे। तीन महिना के रुद्रांश के माता पिता घलोक इही दौर ले गुज़रे रहिन जब लइका ह मां के दूध पीना बंद कर देहे रहिस। कुरूद के सिंधौरीकला ले अपन लइका ल लेके ओ मन सीधा धमतरी के एक निजी अस्पताल म डॉक्टर ल देखाय ल पहुंचिन। लइका के तकलीफ के सेती रुद्रांश के पिता पोखराज अऊ माता श्रीमती टोमिन साहू बर वो दौर बड़ कठिन रहिस।
कुरूद के चिरायु टीम के चिकित्सक ह लइका के स्वास्थ्य परीक्षण म पाइस कि ओला सर्दी खांसी के संग सांस लेहे म तको दिक्कत हे। लइका ल ज़िला अस्पताल म रिफर करे गीस जिहां नान्हे रुद्रांश के जन्म ले हृदय रोग ले पीड़ित होए के संभावना ल देखत ओखर निशुल्क इको जांच बर चिरायु दल ल रायपुर भेजे गीस। जांच म पता चलिस कि रुद्रांश के दिल म छेद हे। ओला TOF (टेट्रोलॉजी ऑफ फैलॉट) नाम ये गंभीर बीमारी ले बचाय खातिर जल्दी ऑपरेशन के जरूरत बताए गीस। नान्हें रुद्रांश ल भर्ती करके ऑपरेट करे गीस। अस्पताल म भर्ती होए के दस दिन बाद 4 जनवरी 2022 के लइका के सफल ऑपरेशन करे गीस। एखर 6 दिन बाद माता पिता अपन लइका के संग अस्पताल ले घर लहुट आइन। तभो ले 15 दिन के बाद फेर लइका के फॉलो अप चिरायु दल ह करिस अऊ पाइस कि अब लइका एकदम स्वस्थ हे।
आज रुद्रांश करीबन 2 साल के हो गए हे अऊ एकदम स्वस्थ हे। ये चमत्कार अऊ वरदान ले कम नइ हे। एखर बर चिरायु दल अऊ शासन के साधुवाद जेकर बदौलत ये खुसी घर लहुटे हे। रुद्रांश के दिल के ऑपरेशन करा के चिरायु दल ह हमार परिवार के दिल जीत लेहे हे। ये वाले कहना हे राज मिस्त्री के काम करइया ओखर पिता श्री पोखराज़ साहू के।
