रायपुर, 2 सितंबर 2020। बैंड, धुमाल, घोड़ी बग्गी वाले मन आज रायपुर के बूढ़ातरिया स्थित धरना स्थल म नारेबाजी करके प्रदर्शन करिन। दौरान धुमाल पार्टी वाले मन ह कहिन कि सबके काम शुरू होगे हे, सिर्फ हमर मन के ही काम शुरू करे के अनुमति नइ मिले हे, एकर सेती सरकार ले अनुरोध हे कि हमन ल घलो जल्द काम शुरू करे के अनुमति देवव। चंदू धुमाल संचालक चंदू कौशिक ह बतइस कि हम लगातार धरना देवत हन, सरकार के तरफ ले कोई हम ल गाइड लाइन नइ मिले हे। हम कई बार ज्ञापन दे चुके हन। सबो बाजार खुल चुके हे, जिम खुल चुके हे, सबो झन ल सामाजिक दूरी बनाके काम करे कहे जावत हे। लेकिन गोल बाजार म भारी संख्या म व्यापारी भीड़ जमा करके खड़े होत हे, सबो दुकान एक दूसरे ले सटे हुए हे, हमन दूर-दूर म काम करे बर तैयार हन, फिर भी हमन ल कोई मउका नइ देहे जात हे।
अध्यक्ष गौतम महानंद ह बतइन कि हमन ल बेरोजगार होय लगभग 8 महीने हो चुके हे, अउ सबो झन के पास ज्ञापन सौप चुके हन लेकिन हमन ल कोनो तरह के कोई आश्वासन नइ दे जावत हे. हमन 25 तारीख के घलो रैली निकाले रेहेन हमन ल आश्वासन दे गे रिहिस कि गणेश चतुर्थी म हमन ल बजाये के अनुमति मिलही, लेकिन हम जब परसों पहुंचेन त कहे गिस कि आप मन बैड, धुमाल नइ बजा सको। आप रोड म नइ निकल सको, हमर साथ ही नाइंसाफी कबार करे जावत हे? सबो दुकान ल खोले के अनुमति दे जावत हे तो सिर्फ हमर संग अइसे व्यवहार कबार करे जात हे?
