‘द बस्तर मड़ई” सांस्कृतिक, पर्यटन स्थल मन म आवव अऊ करव अनुभव
जगदलपुर, 17 अगस्त 2024। उप मुख्यमंत्री श्री विजय शर्मा अपन बस्तर प्रवास के समय जिला प्रशासन कोति ले बस्तर म पर्यटन ल बढ़ावा देहे बर तैयार करे गए ’’द बस्तर मड़ई’’ के लोगो, बस्तर टूरिस्ट सर्किट मैप अऊ थीम म्यूजिक के विमोचन करिन। सर्किट हाउस म कलेक्टर श्री विजय दयाराम के. ह उप मुख्यमंत्री श्री शर्मा ल बताइस के लगभग 75 दिन तक चलइया बस्तर दशहरा के समय कई ठन पूजा विधान के अंतराल ल देखत दशहरा के संगे-संग बस्तर के प्राकृतिक सौंदर्य, ऐतिहासिक अऊ पुरातात्विक महत्व के स्थल, एडवेंचर संग सांस्कृतिक स्थल मन ले पर्यटक मन ल अवगत कराए बर प्रशासन कोति ले ’’द बस्तर मड़ई’’ के कॉन्सेप्ट बनाए गए हे, जेखर से बस्तर म पर्यटक मन ल आन जगा तको घूमे के अवसर मिल सकय। उमन बताइन के द बस्तर मड़ई म नीला रंग म बस्तर के जल ले संबंधित पर्यटन स्थल, हरियर रंग जंगल ले संबंधित स्थल, भूरा रंग गुफा अऊ पुरातव स्थल, पीला रंग आदिवासी संस्कृति, बस्तर के हाट-बाजार अऊ लाल रंग बस्तर दशहरा ल प्रदर्शित करे गए हे। बस्तर टूरिस्ट सर्किट मैप चार रंग के 42 पर्यटन स्थल के जानकारी अउ स्थल के संक्षिप्त विवरण के संग रूट के जानकारी अऊ बस्तर जिला म पहुँचे बर रेल, सड़क, वायुमार्ग के जानकारी देहे गए हे। पहिली पर्यटक मन बस्तर के प्रसिद्ध दशहरा, चित्रकोट जलप्रपात, तीरथगढ़ जलप्रपात, कुटूमसर गुफा ल देखे आत रहिन। बस्तर के ए प्रसिद्ध पर्यटन स्थल के संग बस्तर के आन पर्यटन स्थल के खुबसूरती ल घलोक देखाय के उदीम जिला प्रशासन कोति ले करे जात हे।
ए बेरा म उप मुख्यमंत्री श्री शर्मा ए कार्ययोजना म काम करइया युवा ले घलोक मुलाकात करिन अऊ युवा मन ल प्रोत्साहित करत कहिन के बस्तर ल पर्यटन क्षेत्र म विशेष स्थान देवाए बर आमूलचूल बदलाव लाबोन। बस्तर मड़ई विमोचन के अवसर म बस्तर सांसद श्री महेश कश्यप, विधायक चित्रकोट श्री विनायक गोयल, कमिश्नर श्री डोमन सिंह, आईजी श्री सुंदरराज पी, पुलिस अधीक्षक श्री शलभ सिन्हा, सीईओ जिला पंचायत श्री प्रकाश सर्वे संग आन अधिकारी उपस्थित रहिन।
