छत्तीसगढ़ के मुख्यमंत्री श्री विष्णु देव साय ह सहराईन, कहिन बजट म हर वर्ग के रखे गए हे धियान
रायपुर, 23 जुलाई 2024/ मुख्यमंत्री श्री विष्णु देव साय ह केंद्रीय बजट उपर प्रतिक्रिया देवत कहिन कि यशस्वी प्रधानमंत्री श्री नरेन्द्र मोदी जी के तीसरइया कार्यकाल के पहला बजट आज प्रस्तुत होइस। वित्त मंत्री श्रीमती निर्मला सीतारमन जी के सांतवां बजट दूरदृष्टि अऊ दृढ निश्चय के बजट हे। ये सबके बजट ये, सब बर, सबके विकास के बजट ये।
मुख्यमंत्री ह कहिन कि ए बजट म कृषि अऊ रोजगार उपर सबले जादा ध्यान देहे गए हे जे ह एला ऐतिहासिक बनाथे। छत्तीसगढ़ बर सबले विशेष बात ये हे के जिहां 1.52 लाख करोड़ रूपिया कृषि क्षेत्र बर रखे गये हे, कृषि क्षेत्र के ऐतिहासिक पैकेज देश म एक नवा हरित क्रांति लाके किसान मन ल समृद्ध बनाही।
मुख्यमंत्री ह कहिन कि जनजातीय उन्नत ग्राम योजना लांच होए हे। एखर से जनजाति समाज के 63 हजार गांव अऊ 5 करोड़ मनखे मन ल फायदा मिलही। छत्तीसगढ़ के आदिवासी क्षेत्र मन ल एखर से काफी लाभ होही। उमन कहिन कि एक करोड़ युवा मन बर इंटर्नशिप अऊ इंटर्नशिप के समय पांच हजार रूपिया महीना देहे के प्रावधान रखे गए हे। रोजगार कौशल बर 2 लाख करोड़ के स्कीम शुरू करे जात हे। एखर संगेच मुद्रा लोन के रकम 10 लाख ले बढ़ाके 20 लाख रुपए करे गए हे, जेखर से युवा मन ल स्टार्ट-अप म मदद मिल सकही। ए योजना ले छत्तीसगढ़ के युवा मन ल रोजगार के नवा अवसर मिलही। उहें, बजट म घरेलू संस्थान मन म उच्च शिक्षा बर 10 लाख तक के एजुकेशन लोन प्रावधान करे गए हे। जेखर से शिक्षा अउ स्किल ल नवा ऊंचाई मिलही।
मुख्यमंत्री ह कहिन कि 2.66 लाख करोड़ ग्रामीण विकास बर प्रस्तावित करके प्रधानमंत्री श्री नरेन्द्र मोदी जी के सरकार गांव, गरीब, किसान अऊ युवा मन के हित म कल्याणकारी कदम उठाही। उमन कहिन कि ये बजट मोदी जी के 2047 म भारत ल विकसित बनाए के संकल्प सिद्ध करइया बजट ये। ये बजट एक आदर्श कल्याणकारी राज्य के अवधारणा ल अगू लाथे। भारत ल विकसित बनाए म ए ह मील के पत्थर साबित होही।
मुख्यमंत्री श्री साय ह कहिन बजट म कृषि अउ संबंधित क्षेत्र मन बर 1.52 लाख करोड़ के प्रावधान करे गए हे। एखर से छत्तीसगढ़ के किसान मन ल वित्तीय सुरक्षा अऊ कृषि बर जरूरी संसाधन मिलही। एखर अलावा 6 करोड़ किसान मन के जानकारी लैंड रजिस्ट्री म लाए जाही जेखर से जमीन संबंधी विवाद के जल्दी निपटारा हो सकही। उमन कहिन कृषि म रिसर्च ल ट्रांसफॉर्म करना, एक्सपर्ट के निगरानी, अऊ जलवायु के मुताबिक नवा वैरायटी ल बढ़ावा देहे के योजना छत्तीसगढ़ के किसान मन ल नवा तकनीक अऊ संसाधन मन के लाभ प्रदान करही।
मुख्यमंत्री ह कहिन बजट म सरकार कोति ले रोजगार ले जुड़े प्रोत्साहन देहे गए हे। 1 लाख रुपिया ले कम सैलेरी होए म इपीएफओ म पहली बार रजिस्टर करइया मनखे मन ल 15 हजार रुपए के मदद तीन किश्त म मिलही। नवा कर्मचारी मन ल एक महीना के वेतन, विनिर्माण क्षेत्र म रोजगार सृजन, नियोक्ता मन ल सहायता देहे गए हे।
मुख्यमंत्री ह कहिन कि बजट म सैलरीड मनखे मन ल बड़ राहत मिले हे। टैक्स स्लैब म बदलाव लाए गए हे, एखर से करदाता मन ल बचत होही। उमन कहिन बजट म शहर मन के क्रिएटिव री-डेवलपमेंट बर पॉलिसी लाए जाही अऊ पोलावरम सिंचाई परियोजना ल पूरा करे के बात कहे गए हे। एखर अलावा बजट म नवाचार, अनुसंधान अऊ विकास म विशेष ध्यान देहे गए हे।