दुर्ग, 28 मार्च 2020। वैश्विक महामारी कोरोना वायरस के संक्रमण ल रोके बर केंद्र सरकार कोति ले घोषित 21 दिन के लाक डाउन के सेती देश के गरीब अउ असहाय मनखे मन के आगू रोजी-रोटी के उपजे संकट ले निपटे बर जिहां कई ठन संस्था समाज अउ समुदाय आगू आवत हे उहें दुर्ग के चौहान फाउंडेशन ह घलोक संवेदनशीलता देखात, अपन सामाजिक उत्तरदायित्व के निर्वहन करत जरूरतमंद मनखे मन बर भोजन के निशुल्क व्यवस्था करे हे।
जानबा होए हे के चौहान फाउंडेशन ह जरूरतमंद मनखे मन के घर कच्चा अउ पक्का भोजन पहुंचाए के काम सरलग करे जात हे संगेच चौहान फाउंडेशन ह हेल्पलाइन नंबर 6262630000 घलोक जारी करे हे, जेमा कोनो बेरा फोन करके गरीब अउ असहाय मनखे बर भोजन के व्यवस्था कर सकत हें। चौहान फाउंडेशन के संचालक के एस. चौहान ह बताइस के देश म कोरोना वायरस संक्रमण के जइसे संकट मंडरावत हे अइसन म देश के हरेक नागरिक मन ल आगू आके मदद करे के जरूरत हे। जेकर से, ये बिकट स्थिति म काकरो भूख से मौत झन होवय। उमन देशवासी मन ले सावधानी अऊ सतर्कता बरते के अपील घलोक करे हें अऊ मनखे मन म जागरूकता फैलाय के घलोक संदेश देहे हें।
