अपन स्कूल पहुंचके जुन्ना दिन ल सुरता करिन मुख्यमंत्री, कहिन शिक्षा ले बहुत कुछ बदलथे

रायपुर, 5 जुलाई, 2024। राज्य स्तरीय शाला प्रवेशोत्सव के मौका म मुख्यमंत्री श्री विष्णु देव साय ग्राम बगिया के उही स्कूल कैंपस म पहुंचिन जिहां कई बरस पहिली उमन अपन पांचवी कक्षा के पढ़ाई करे रहिन। उमन बताइन के स्कूल ल साफसुथरा रखे बर हमन घर ले गोबर लाके लिपाई करत रहेन। स्कूल के रखरखाव के पूरा गांव चिंता करय अऊ छत के मरम्मत गांव वाले मिलके करत रहिन। वो समे टाटपट्टी घलोक नइ रहिस, घर ले बोरी लेके आत रहेन, सीसी रोड घलोक नइ रहिस। पांचवी बोर्ड के सेंटर घलोक नइ रहिस अऊ सेरामोंगरा जाना परय। अब शिक्षा बर अतका सुविधा हो गए हे त अच्छा लागथे। काबर कि शिक्षा हमार विकास के मूलमंत्र हे ते पाए के एखर बेहतरी बर हम सरलग काम करत हन। मुख्यमंत्री ह ए अवसर म जशपुर म दिव्यांग आदर्श आवासीय विद्यालय के घोषणा करिन, संगेच ग्राम बगिया अऊ बंदरचुआ के स्कूल ल आदर्श विद्यालय बनाए के घोषणा करिन। उमन फरसाबहार म हायरसेकेंडरी स्कूल के घोषणा घलोक करिन। अपन संबोधन म मुख्यमंत्री ह कहिन कि आज के दिन मोर अऊ बगिया वासी मन बर ऐतिहासिक दिन हे। मैं ह बगिया म पांचवीं तक के पढ़ाई करे हंव। शिक्षा मात्र डिग्री या नौकरी हासिल करे बर नइ हे। ये जीवन ल बदलथे। आप मन शिक्षित अऊ अशिक्षित मनखे के जीवन स्तर ल देखके खुदे अंदाजा लगा सकत हव के शिक्षा के जीवन म कतका महत्व हे। मुख्यमंत्री ह कहिन कि प्राचीन काल ले ही हमर देश शिक्षा के  क्षेत्र म विश्वगुरु रहे हे। नालंदा अऊ तक्षशिला ले शिक्षा प्राप्त करके बहुत अकन मनखे आगू बढ़े हें।