- उंखर हालचाल जानिन, कहिन आप मन के योगदान हमेशा याद रखे जाही
- श्री बघेल ह ओ मन ल मिलत सुविधा मन के जानकारी लीन अऊ कहिन आप मन के खांधा म कोरोना ल हराए के बड़का जिम्मेदारी हे
रायपुर 9 अप्रैल 2020। कोरोना वायरस के संक्रमण ल रोके बर लागू लॉकडाउन के बेरा म दिन-रात कठिन ड्यूटी देवत पुलिस वाले मन ले आज मुख्यमंत्री श्री भूपेश बघेल ह अपन निवास कार्यालय ले टेलीफोन म बातचीत करके उंखर हालचाल जानिन। उमन पुलिस कर्मी मन ल होवत कठिनाइ अऊ मिलत सुविधा मन के जानकारी लीन अऊ उमन ले कहिन के आप मन के खांध म कोरोना ल हराए के महत्वपूर्ण जिम्मेदारी हे।
श्री बघेल ह पुलिस कर्मी मन ले कहिन के आप मन के काम बहुत महत्वपूर्ण हे। आप मन के खांध म ही कोरोना वायरस के फैलाव ले बचाय के जिम्मेदारी हे, कहूं आप मन अपन जिम्मेदारी के बने सहिन निर्वहन करिहव, त फेर हम जरूर कोरोना ल हरा पाबोन। आप मन सबो बहुत अच्छा काम करत हौ। सुरता रखव एखर ले महत्वपूर्ण कोनो चुनौती नइ हे, आप मन मानवता के सेवा म पहली लाइन म खड़े हव, आप मन के योगदान हमेशा याद रखे जाही। अपन कर्तव्य के निर्वहन के समय आप मन सोशल डिस्टेंसिंग संग कोविड-19 ले बचाव के सबो उपाय के कड़ाई ले पालन करव।
मुख्यमंत्री श्री बघेल ह रायपुर के निकट निमोरा म बनाय गए कॉरेन्टीन सेंटर म ड्यूटी देवत एसआई श्री युधिष्ठिर ध्रुव, बिलासपुर के हेड कांस्टेबल श्री अरविंद सिंह, दुर्ग के सुपेला म डयूटी देवत महिला आरक्षक श्रीमती यास्मीन खान, दंतेवाड़ा के एसआई श्रीमती सुनीता साहू अऊ बलरामपुर जिला के सीमावर्ती क्षेत्र म ड्यूटी देवत एएसआई श्री पुष्पराज सिंह ले बड़ मयारू ढ़ग ले बातचीत करिन अऊ उंखर हौसला बढ़ाइन।
मुख्यमंत्री ह ए पुलिस कर्मी मन ले पूछिन के आप मन के ड्यूटी कहां हे, लॉक डाउन के उल्लंघन करइया मन के संग आप मन कइसे व्यवहार करत हव। उमन पुलिस कर्मी मन के खाए के इंतजाम के बारे म घलोक जानकारी लीन। श्री बघेल ह ए पुलिस कर्मी मन ले कहिन के आप मन के सेहत हमार बर बड़ महत्वपूर्ण हे। कोरोना ले लड़ाई म आप मन पहिली लाईन म तैनात हव, अपन सुरक्षा करत ड्यूटी के निर्वहन करव। उमन ये घलोक कहिन के ड्यूटी ले घर जाय के बाद सबले पहिली नहावव अउ तेकर बाद ही परिवार वाले मन ले मिलव।
