मुख्यमंत्री ह लॉक डाउन के बेरा म राजधानी रायपुर म जरूरतमंद अऊ बेसहारा मनखे मन बर बनाय गए आश्रय स्थल के भ्रमण करिन अउ व्यवस्था मन के जानकारी लीन

रायपुर, 1 अप्रेल 2020। मुख्यमंत्री श्री भूपेश बघेल ह आज राजधानी रायपुर के लाभांडी म प्रधानमंत्री आवास योजना के सर्वसुविधायुक्त बहु मंजिला भवन म कोरोना वायरस ले बचाव बर बनाय गए आश्रय स्थल के भ्रमण करके उहां करे गए व्यवस्था मन के जानकारी लीन। ये आश्रय स्थल म बांग्लादेश के एक मनखे संग 11 राज्य के 205 मनखे मन ल आश्रय देहे गए हे। इमन म छत्तीसगढ़ के 121 मनखे हें। 11 मनखे अइसन घलोक हे जेमन ल अपन निवास के पता नइ हे। इहां जरूरतमंद अऊ बेसहारा मनखे मन के रहे अऊ भोजन के इंतजाम करे गए हे। ये बेरा म कलेक्टर डॉ. एस. भारतीदासन, वरिष्ठ पुलिस अधीक्षक श्री आरिफ शेख, नगर निगम रायपुर के कमिश्नर श्री सौरभ कुमार, जिला पंचायत के सीईओ डॉ. गौरव कुमार सिंह घलोक उपस्थित रहिन।