आईआईटी बर चयनित दु छात्र ल कलेक्टर ह दीस शुभकामना, कहिन मेहनत अउ लगन के संग आगू के पढ़ाई करव

जांजगीर-चांपा, 6 अक्टूबर। कलेक्टर यशवंत कुमार ह आईआईटी बर एडवांस परीक्षा म चयनित दु छात्र ल उखर उज्जवल भविष्य के शुभकामना दीन हे। चयनित छात्र रविशंकर अउ चूड़ामणि साहू ह मंगलवार के कलेक्टर कक्ष म यशवंत कुमार ले मुलाकात करिन। कलेक्टर ह ये दुनों प्रतिभावान छात्र ल आईआईटी म चयन होय बर ओमन ल शुभकामना दीन। कलेक्टर ह ये छात्र मन ले कहिन हे कि वे मेहनत अउ लगन के संग आगू के पढ़ाई करव, अपन अउ अपन परिवार के संग जांजगीर जिला के नाम रोशन करव। ज्ञातव्य हे कि जांजगीर के आकांक्षा परिसर म जिला के प्रतिभावान विद्यार्थी ल प्रतियोगी परीक्षा बर जिला खनिज न्यास निधि (डीएमएफ) कोचिंग के व्यवस्था करे गेहे। एखर संचालन कलेक्टर के मार्गदर्शन म करे जावत हे। ये अवसर म दुनो छात्र मन के पिता अउ जिला रोजगार अधिकारी उपस्थित रिहिस।