कोण्डागांव, 27 जुलाई 2020। विकासखण्ड कोण्डागांव ले 30 किलोमीटर के दूरी म स्थित घना जंगल के बीच हे आदिवासी बहुल गांव मयूरडोंगर अऊ चारगांव। दू या तीन साल पहिली ये दुनों गांव के किसान मन जंगल के भूइयां म कईयोन पीढ़ी ले धान के खेती करत अपन जीवन यापन करत रहिन। पाछू इमन ल वनाधिकार पट्टा तको मिल गए। वनाधिकार पट्टा ले मिले कृषि जमीन म विकास के सम्भावना मन ल देखके स्थानीय जिला प्रशासन ह साल 2017-18 म चारगांव अउ मयूरडोंगर ल वृहत्तर कार्ययोजना म सामिल करिस। एखर अन्तर्गत ए दूनों गांव म वनाधिकार पट्टाधारी किसान मन ल कृषि, उद्यानिकी, क्रेडा, पशुपालन अउ मत्स्य विभाग के जम्मो योजना मन ले एक संग लाभांवित करे के निर्णय ले गीस ताकि वनाधिकार पट्टा के तहत् विकास के नवा माडल स्थापित करे जा सकय।
दू बछर म बदल गीस गांव मन के तस्वीर
अभी हाल म ए गांव मन ल देखे के बाद अइसे लागथे के जेन गांव पहिली जंगल के बीहड़ गांव रहिस आज उहां जगा-जगा मछली पालन बर तलाब, कुकुट अउ पशुपालन बर शेड, सिंचाई बर सोलर ऊर्जा के ईकाई मन के एक कड़ी सरलग दिखथे। इही कड़ी म वृहत्तर कार्ययोजना के तहत् ग्राम चारगांव के 27 वनाधिकार पट्टाधारी कृषक परिवार के चयन करके ऊंखर 168 एकड़ जमीन म फैन्सिंग तार ले घेराव करके बोरवेल खोदाए गए हे ताकि सबो किसान परिवार ल कम से कम तीन फसलीय कृषि के विकल्प मिल सकय। एकर संगेच उद्यानिकी विभाग के माध्यम ले खेत मन के मेड़ म मुनगा, नरियर, आमा के पौधा के रोपण घलोक करे गए हे। अइसनहे मयूरडोंगर गांव म घलोक वनाधिकार पट्टाधारी मन म ले 28 किसान परिवार के 115 एकड़ जमीन ल तार ले घेरा मारके सुरक्षित करे गए हे अउ 08 बोरवेल खोदे गए हे। संगेच इही जमीन म 10 तालाब बनाए गए हे अऊ 37 भूमिसुधार के काम घलोक सुरू करे गए हे। अभी हाल म इहां 20 तालाब अऊ 25 कुकुट शेड के निर्माण हो गए हे। इहां सिंचाई बर ट्यूबवेल बोरखनन, ड्रिप स्प्रिंकलर के माध्यम ले आधुनिक खेती के शुरूआत घलोक करे जा चूके हे। ए वनाधिकार पट्टाधारी चुने गए परिवार के महिला मन ल आत्मनिर्भर बनाए के उद्देश्य ले पोल निर्माण जइसे रोजगार परक प्रशिक्षण घलोक देहे जात हे।
ये संबंध म ग्राम मयूरडोंगर के किसान जयसिंह के बताती सौर ऊर्जा पम्प के सेती ओखर खेत म आज सिंचाई सुविधा मिल गए हे अउ ओखर कई बछर के साध पूरा हो गए हे। गर्मि म जऊन खेत सूखा अऊ बंजर रहत रहिस अब उही खेत मन म खरीफ के बाद रबी के फसल घलोक हो सकही। एखर बर ओला उद्यानिकी विभाग ले मुनगा अऊ आमा के उन्नत पौधा कृषि विभाग कोति ले निःशुल्क दे गये हे।
जानबा हे के अइसनहे 13 वनाधिकार पट्टाधारी किसान मन के खेत म घलोक सौर सुजला योजना के तहत् सोलर पम्प लगाए गये हे। जिला प्रशासन ह वनाधिकार पट्टाधारी किसान मन ल विकास के मुख्य धारा म लाय बर विकासखण्ड केशकाल के ग्राम रावबेड़ा म घलोक 72 एकड़ जमीन म समन्वित मेगा प्रोजेक्ट के श्रीगणेश करे हे। जिला म वनाधिकार अधिनियम के तहत् ग्राम स्तर म 67920 मिले दावा म ले अब तक 52738 प्रकरण ल अनुमोदित कर दे गए हे। जबकि 15182 दावा अपात्र पाये गये हे। एमां 59832.574 एकड़ जमीन बांटे गये हे।