अब अटक-अटक के नहीं, सांय-सांय जाही मितानिन बहिनी मन के बैंक खाता म राशि : मुख्यमंत्री श्री विष्णुदेव साय

छत्तीसगढ़ के स्वास्थ्य व्यवस्था के आधार हे मितानिन बहिनी मन के समर्पण अउ  योगदानः श्री विष्णुदेव साय
मितानिन बहिनी मन के बिना आखरी छोर तक काम कर पाना मुश्किलः स्वास्थ्य मंत्री श्री श्याम बिहारी जायसवाल
मुख्यमंत्री श्री विष्णु देव साय ह रिमोट बटन दबाके मितानिन मन के खाता म 90 करोड़ 8 लाख 84 हजार 20 रुपिया के करिन अंतरण

रायपुर, 12 जुलाई 2024। मुख्यमंत्री श्री विष्णुदेव साय ह विकसित छत्तीसगढ़ के संकल्पना उपर काम करना शुरू कर देहे हे अऊ एखर शुरूआत स्वस्थ छत्तीसगढ़ के बात के संग करे हें। मुख्यमंत्री श्री साय ह आज राजधानी रायपुर के दीनदयाल उपाध्याय आडिटोरियम म राज्य भर ले आए हजारों मितानिन बहिनी मन के आगू कहिन कि उंखर सरकार पूरा पारदर्शिता के संग काम करत हें अऊ वो राज्य म सुशासन के रद्दा म आगू बढ़त हें। उमन कहिन कि ऊंखर ए सफर म राज्य भर म काम करत लगभग 72 हजार मितानिन बहिनी मन के घलोक अमूल्य योगदान हे जिनकर दम म राज्य मातृ मृत्यु दर अऊ शिशु मृत्यु दर म अभूतपूर्व सुधार हासिल करे मे कामयाब होय हे।

ए मौका म मुख्यमंत्री श्री विष्णुदेव साय ह मितानिन बहिनी मन ल नवा सौगात देवत ओ मन ल हर महिना ऊंखर प्रोत्साहन राशि ल सीधा बैंक खाता म ट्रांसफर करे के शुरूआत करिन। मुख्यमंत्री ह रिमोट के बटन दबाके राज्य स्तर ले मितानिन प्रोत्साहन राशि के सीधा बैंक खाता म अंतरण करे गीस। ए अंतरण ले राज्य भर के मितानिन  बहिनी मन के खाता म 90 करोड़ 8 लाख 84 हजार 20 रुपए के अंतरण होइस। ए राशि म केंद्र अउ राज्य के अंश के संग ही मितानिन प्रोत्साहन राशि घलोक सामिल हे। ये राशि 69 हजार 607 मितानिन बहिनी, 3 हजार 448 मितानिन प्रशिक्षक, 289 ब्लॉक समन्वयक, 176 स्वास्थ्य पंचायत समन्वयक, 26 शहरी क्षेत्र समन्यवक अउ 285 मितानिन हेल्प डेस्क समन्वयक ल राज्य स्तर ले एक संग भुगतान करे गीस।