मुख्यमंत्री ह ए मौका म काफी टेबल बुक के करिन विमोचन
प्रदेश म 10,000 आजीविका डबरी बनाय के काम के करिन सुभारंभ
पीएम आवास के हितग्राही मन ल आजीविका डबरी के स्वीकृति पत्र बांटिन
रायपुर, मुख्यमंत्री श्री विष्णु देव साय ह अपन पहिली मंत्रिपरिषद के बइठका म प्रधानमंत्री आवास योजना (ग्रामीण) के तहत 18 लाख आवास के मंजूरी के फैसला के दू साल पूरा होय के मौका म आज एक ठन काफी टेबल बुक के विमोचन करिन। ए मौका म उमन प्रदेश म 10,000 आजीविका डबरी बनाय के काम के घलो सुभारंभ करिन।
कार्यक्रम म कवर्धा जिला के जनमन आवास योजना के हितग्राही अउ नारायणपुर जिला के आत्मसमर्पित नक्सली अउ नक्सल हिंसा ले प्रभावित परिवार मन बर चलत बिसेस परियोजना के तहत प्रधानमंत्री आवास योजना (ग्रामीण) के हितग्राही मन ल आजीविका डबरी के स्वीकृति पत्र घलो देहे गीस। ए बेरा म उपमुख्यमंत्री श्री विजय शर्मा, पंचायत अउ ग्रामीण विकास विभाग के प्रमुख सचिव श्रीमती निहारिका बारीक सिंह, प्रधानमंत्री आवास योजना के संचालक अउ आयुक्त महात्मा गांधी नरेगा श्री तारन प्रकाश सिन्हा अउ पंचायत अउ ग्रामीण विकास विभाग के सचिव श्री भीम सिंह मौजूद रहिन।
छत्तीसगढ़ म प्रधानमंत्री आवास योजना (ग्रामीण) के तहत साल 2016 ले 2026 तक 26.27 लाख आवास के लक्ष्य के बलदा अब तक 24.37 लाख आवास के मंजूरी हो गए हे, जेमा ले 17.14 लाख घर बनके तियार हो गए हे। मुख्यमंत्री श्री साय के अगुवाई म सिरिफ दू साल म करीबन 8 लाख आवास के निर्माण पूरा करके एक ठन नवा कीर्तिमान (रिकार्ड) बनाय गे हे, जेन ह योजना के सही क्रियान्वयन ल देखावत हे।
मुख्यमंत्री श्री विष्णु देव साय के अगुवई म राज्य सरकार डहर ले बीते दू साल के छोट कन कार्यकाल म ही लगभग 8 लाख आवास के निर्माण पूरा हो गए हे। ये उपलब्धि राज्य म आवास बनाय के गति ल बतावत हे। खास करके पाछू 6 महिना म रोज औसतन 2000 घर के निर्माण पूरा करे गीस, जेन ह प्रशासनिक काम-काज के मजबूती अउ सरलग निगरानी के नतीजा आय।
जानबा हे कि प्रधानमंत्री आवास योजना (ग्रामीण) के सुभारंभ अप्रैल 2016 म करे गे रिहिस, जेकर उद्देश्य गाँव-देहात (ग्रामीण क्षेत्र) म पात्र परिवार मन ल पक्का घर देना हे। ए योजना के तहत हर आवास बर 1.20 लाख रूपिया के आर्थिक सहायता देहे जाथे। संगेच, योजना ल आने योजना मन संग जोड़े गे हे, जेकर तहत मनरेगा ले 90 दिन के मजूरी अउ स्वच्छ भारत मिशन (ग्रामीण) ले 12 हजार रूपिया के सहायता शौचालय बनाय बर देहे जाथे, जेकर ले हितग्राही ल पूरा आवास सुविधा मिल सकय।
महात्मा गांधी राष्ट्रीय ग्रामीण रोजगार गारंटी योजना (मनरेगा) के तहत प्रदेश म 10,000 आजीविका डबरी बनाय के काम ‘मोर गांव-मोर पानी’ महाअभियान के तहत चलाय जावत हे। ये डबरी मन के निर्माण पात्र हितग्राही मन के निजी जमीन म करे जाही, जेमा प्रधानमंत्री आवास योजना (ग्रामीण) के हितग्राही घलो सामिल हें। सबो डबरी मन ल मई 2026 तक पूरा करे के लक्ष्य रखे गे हे।
आजीविका डबरी परियोजना ले ग्रामीण क्षेत्र म जल संरक्षण अउ जल संवर्धन, सिंचाई सुविधा म बढ़ोत्तरी, मछरी पालन, बत्तख पालन, पेंड़ लगाय (वृक्षारोपण) अउ सिंघाड़ा उत्पादन जइसन काम ल बढ़ावा मिलही। एकर ले ग्रामीण परिवार मन ल स्थायी रोजी-रोटी (आजीविका) के अउ मउका मिलही अउ उंकर आमदनी म बढ़ोत्तरी होही। ए प्रकार ले, प्रधानमंत्री आवास योजना (ग्रामीण) अउ मनरेगा के मेल ले राज्य सरकार ग्रामीण विकास, आवास सुरक्षा, रोजगार अउ जल संरक्षण के लक्ष्य ल एक संग पूरा करत हे, जेन ह छत्तीसगढ़ के समावेशी अउ सतत विकास के दिशा म एक ठन महत्वपूर्ण कदम आय।