- पशुपालक अऊ संग्राहक मन ल गोबर खरीदी के एवज म अब तक 100.82 करोड़ रूपिया के करे गए हे भुगतान
- मुख्यमंत्री ह पशुपालक अऊ संग्राहक, गौठान मन म कार्यरत स्व-सहायता समूह मन अऊ गौठान समिति मन के खाता म करिस कुल 5.33 करोड़ रूपिया के अंतरण
- गोबर ले बिजली उत्पादन के संभावना मन के करे जाए अध्ययन
- चारा उत्पादन के मामला म गौठान मन ल स्वावलंबी बनाए के होवय प्रयास
- गौठान मन म तेलघानी, लौह शिल्पकार, चर्म शिल्पकार अउर रजककार बोर्ड के गतिविधि होवय चालू
- गौठानों के संधारण, मरम्मत अऊ निर्माण काम मन के जरूरत के कलेक्टर करय समीक्षा
रायपुर, मुख्यमंत्री श्री भूपेश बघेल ह कहे हें कि छत्तीसगढ़ गोबर खरीदी करइया देश के पहिली राज्य होए के संगें-संग गोबर खरीदी ल लाभ म बदलइया पहला राज्य घलोक ये। उमन कहिन कि गोबर ले वर्मी कम्पोस्ट तियार करे के संग एला अऊ जादा लाभप्रद बनाए के दिशा म काम करे जाना चाही। गोबर ले बिजली उत्पादन के संभावना मन के अध्ययन करे जाए, चारा के मामला म गौठान मन ल स्वावलंबी बनाए के संग इहां आर्थिक गतिविधि मल ल बढ़ाए के प्रयास करना चाही। उमन कहिन कि प्रदेश म गौठान मन के प्रति मनखे मन के रुझान बाढ़त हे, गौठान मन ल अऊ जादा मजबूत बनाय जाना चाही। कलेक्टर मन गौठान मन के संधारण, मरम्मत अऊ निर्माण काम मन के जरूरत के लगातार समीक्षा करयं अऊ जरूरत के मुताबिक काम करावयं।
मुख्यमंत्री आज इहां अपन निवास कार्यालय म गोधन न्याय योजना के अंतर्गत गोबर बेचइया पशुपालक अउ संग्राहक मन ल गोबर खरीदी के एवज म राशि, महिला स्व-सहायता समूह मन ल लाभांश के राशि अऊ गौठान समिति मन ल 5 करोड़ 33 लाख रूपिया के राशि के अंतरण करे के बाद कार्यक्रम ल सम्बोधित करत रहिन। मुख्यमंत्री ह कार्यक्रम म गोधन न्याय योजना के अंतर्गत पशुपालक अउ संग्राहक मन के खाता म क्रय करे गोबर के एवज म 27वां किश्त के रूप म 1 करोड़ 74 लाख रूपिया के राशि ऑनलाईन अंतरित करिन। ये राशि ल मिलाके पशुपालक अऊ संग्राहक मन ल गोबर खरीदी के अब तक 100 करोड़ 82 लाख रूपिया के राशि के भुगतान करे जा चुके हे। उमन ये बेरा म स्व-सहायता समूह मन ल लाभांश के रूप म 1 करोड़ 41 लाख रूपिया अऊ गौठान समिति मन ल 2 करोड़ 18 लाख रूपिया के राशि के भुगतान करिन।
स्व-सहायता समूह मन ल अब तक लाभांश के राशि के रूप म कुल 21 करोड़ 42 लाख रूपिया अऊ गौठान समिति मन ल 32 करोड़ 94 लाख रूपिया के राशि के भुगतान करे जा चुके हे। स्व-सहायता समूह मन अऊ गौठान समिति मन ल अब तक कुल 54 करोड़ 36 लाख रूपिया के राशि के भुगतान करे गए हे। गोधन न्याय योजना ले 1 लाख 74 हजार ले जादा पशुपालक अऊ संग्राहक लाभान्वित होए हें। अब तक 50 लाख क्विंटल गोबर के खरीदी होए हे।
मुख्यमंत्री ह कहिन कि मनखे गोबर ले वर्मी कम्पोस्ट के अलावा दुसर लाभप्रद गतिविधि चालू करे कोति बढ़त हें। कुछ जगा मन म गौठान म गोबर गैस तियार करके घर मन म गैस सप्लाई के काम घलोक चालू होय हे। उमन अधिकारी मन ले कहिन कि गोबर ले बिजली उत्पादन के संभावना मन के अध्ययन करे जाना चाही। कहूं ये काम संभव होथे, त ये एक बड़का उपलब्धि होही। मुख्यमंत्री ह ये घलोक कहिन कि राज्य शासन कोति ले छत्तीसगढ़ तेलघानी, लौह शिल्पकार, चर्म शिल्पकार अउ रजककार बोर्ड के गठन करे गए हे। ए बोर्ड़ के गतिविधि मन घलोक गौठान म चालू करे जाए, जेखर से मनखे मन ल रोजगार के अवसर मिल सकय। मुख्यमंत्री ह कहिन कि गौठान मन के संचालन एक निरंतर प्रक्रिया ये, ते पाए के गौठान मन म निर्माण, संधारण अऊ मरम्मत आदि काम लगातार करे के जरूरत हे। सबो कलेक्टर मन ये विसय ल सप्ताहिक समय-सीमा के बैठक म सामिल करके गौठान मन म संचालित गतिविधि मन के निरंतर समीक्षा करव। उमन कहिन कि जिहां गौठान समिति मन सक्रिय नइ हे, उहां जनप्रतिनिधि, कलेक्टर अऊ जिला पंचायत के मुख्य कार्यपालन अधिकारी मन ले चर्चा करके दूसर मनखे मन ल मौका दे जाना चाही।
मुख्यमंत्री ह कहिन कि प्रदेश म गौठान मन के संख्या म निरंतर वृद्धि होवत हे अऊ शहरी क्षेत्र मन म घलोक गौठान अऊ गोधन न्याय योजना ल लेके लोकप्रियता बाढ़त हे। उमन कहिन कि प्रदेश म स्वावलंबी गौठान मन के संख्या घलोक बाढ़त हे। एक साल म स्वावलंबी गौठान मन के संख्या बाढ़के 1634 हो गए हे। एकर मतलब हे कि मनखे मन के ए योजना के प्रति रूझान बाढ़त हे। श्री बघेल ह कहिन कि दू रूपिया किलो म गोबर खरीदी करइया छत्तीसगढ़ देश के पहला राज्य ये। एखर संगेच छत्तीसगढ़ म गोबर ल लाभ के चीज म बदले म घलोक सफलता मिले हे। गोबर ले तियार होवत वर्मी कम्पोस्ट के उपयोग बड़ संख्या म किसान स्व-प्रेरणा ले करत हे। एखर से जिहां जैविक खेती ल बढ़ावा मिलत हे, उहें गौठान मन म वर्मी कम्पोस्ट बनाए के काम म संलग्न अऊ आन आर्थिक गतिविधि मन म काम करत 9 हजार ले जादा स्व-सहायता समूह मन के करीबन 64 हजार महिला मन ल रोजगार अऊ आय के नवा जरिया मिले हे। वर्मी कम्पोस्ट के उपयोग ले सब्जि, अनाज अऊ फल मन के गुणवत्ता बेहतर होही अऊ ओ मन स्वास्थ्य के दृष्टि ले घलोक लाभदायक होही।
मुख्यमंत्री ह गोधन न्याय योजना अऊ गौठान मन के सफल संचालन बर अधिकारी-कर्मचारी, जनप्रतिनिधि अऊ गांव वाले मन ल बधाई अऊ शुभकामना दीन।
