सारंगढ़-बिलाईगढ़, नेहा राठौर के खबर/ कलेक्टर डाॅ फरिहा आलम सिद्दीकी ह कलेक्टोरेट म 5 झन दिव्यांग लईका मन ल श्रवण यंत्र(कान म लगाए के मसीन) दिस हे। ए लईका मन पहिली सुने म असमर्थ रहिस हे, जेकर कारन ले ओमन ल अपन रोज के जीवन म बहुत अकन परेसानी ले जुझे ब परए,श्रवण यंत्र ल लगाए म अब ओ सब समस्या ले राहत मिल जाही ।
अब एमन लोगन मन के गोठ बात ल सुने सक दारही अउ ओमन करा गोठिया के अपन बात ल बताए समझाए घलो स्
सक दारही , जे हर ए लईका मन ब एक परकार के बरदान होए।
बरमकेला निवासी 13 बछर के छात्र तरून ल कलेक्टर डाॅ सिद्दीकी के आघू म श्रवण यंत्र लगाके मसिन के जाँच करे गईस। तरुन ह न तो सुने सकत रहिस हे न तो बोले सकथे ,ओकर कान म श्रवण यंत्र ल लगाए गईस तहां कलेक्टर ह तरून ल पूछिस सुनई देथे त तरुन ह अपन मुख म मुस्कान के संग हाँ म उत्तर दिहिस।
तरुन असन अउ लईका गांव टिमरलगा सारंगढ़ निवासी रोहन मौर्या ( उम्र 9 बछर ) , पिंडरी ‘डी’ सारंगढ़ निवासी राजवीर बंजारे ( उम्र 9 बछर), गोबरसिंघा बरमकेला निवासी कबीर सिदार ( उम्र 4 बछर ) अउ प्राथमिक स्कूल बरमकेला के छात्रा सोनिया सिदार ( उम्र 9 बछर) ल श्रवण यंत्र दिए गईस।
समाज कल्याण विभाग के द्वारा श्रवण यंत्र के संग कुल 36 ठ बेटरी घलो दिए गए हे। विभाग के अधिकारी ह बताइस के एमा से एक ठ बैटरी ह कुल दु महिना तक चलही।ए मसिन ल पानी म भिंजोए ले बचाए ब घलो कहे हे। कलेक्टरेट म मुख्य चिकित्सा अउ स्वास्थ्य अधिकारी डॉ एफ आर निराला, जिला कार्यक्रम प्रबंधक श्री एन एल इजारदार अउ समाज कल्याण विभाग के उप संचालक श्री विनय कुमार तिवारी मन उपस्थित रहिस हे।
