अम्बिकापुर, 22 अगस्त 2024। सरगुजा संभाग के सरगुजा, जशपुर, सूरजपुर अऊ बलरामपुर जिला के पांच छात्रा मन ह रक्षाबंधन के अवसर म राजधानी दिल्ली म महामहिम राष्ट्रपति श्रीमती द्रौपदी मुर्मू ले सौजन्य मुलाकात करिन। ए बेरा म म केंद्रीय शिक्षा मंत्री श्री धर्मेंद्र प्रधान ह लइका मन के कुशल क्षेम जानत उखर उत्साह वर्धन करिन अऊ सबो ल उज्ज्वल भविष्य के शुभकामना दीन। ए सुग्घर बेरा बर छात्रा मन ह अड़बड़ अछाह के संग मुख्यमंत्री श्री विष्णुदेव साय अउ प्रशासन के प्रति आभार व्यक्त करिन।
पढ़ाई के संग संग खेल, संगीत अउ आन गतिविधि मन म उत्कृष्ट प्रदर्शन के आधार म छात्रा मन के चयन करे गीस जेमां सरगुजा ले कस्तूरबा आवासीय विद्यालय लखनपुर के छात्रा ज्योति, जशपुर जिला ले रिया अउ रजनी चौहान, सूरजपुर ले नंदिनी किंडो अऊ बलरामपुर ले प्रशंसा सामिल रहीस। राज्य कार्यालय ले सरगुजा संभाग के लइका मन के संग प्रभारी के रूप म अधीक्षिका अनुराधा सिंह के चयन करके दिल्ली भेजे गीस।
महामहिम राष्ट्रपति श्रीमती मुर्मू से छात्रा मन ले मुलाक़ात के समय ओ मन ल रक्षाबंधन के बधाई दीन अउ रक्षाबंधन पर्व के महत्व के बारे म बतात छात्रा मन ले ऊंखर पढ़ई अऊ जीवन के लक्ष्य के बारे म जानकारी लेके लक्ष्य प्राप्ति बर ईमानदारी ले प्रयास करे के सुझाव देहे गीस। उमन छत्तीसगढ़ के संस्कृति, इहां के प्राकृतिक सौंदर्य अउ आन विशिष्टता के बारे म छात्रा मन ले जानकारी लीन। छात्रा मन ह ओ मन ल राखी बाँधत उपहार घलोक दीन।
पहली पइत राष्ट्रपति ले मुलाकात अऊ देश के राजधानी नई दिल्ली के महत्वपूर्ण स्थल के भ्रमण ले छात्रा मन अड़बड़ रोमांचित अउ उत्साहित रहीन। बिरसपतवार के रायपुर वापस लहुटे छात्रा मन ह एमडी संपूर्ण शिक्षा श्री संजीव झा अउ एससीईआरटी डायरेक्टर श्री राजेंद्र कटारा, उप संचालक संपूर्ण शिक्षा श्री राजेश सिंह अउ आन अधिकारी मन ले मुलाकात करिन अऊ राष्ट्रपति भवन अउ दिल्ली के सुग्घर सुरता के संग पहली विमान यात्रा के अनुभव ल शेयर करत मौका देहे बर धन्यवाद ज्ञापित करिन।
जिला कलेक्टर श्री विलास भोसकर, सीईओ ज़िला पंचायत श्री नूतन कंवर, संयुक्त संचालक शिक्षा श्री संजय गुप्ता, डीईओ श्री अशोक सिन्हा अउ डीएमसी रविशंकर तिवारी ह अधीक्षिका अउ छात्रा मन ल उंखर ए उपलब्धि बर बधाई दीन अउ भविष्य म घलोक अइसनहे उत्कृष्ट काम करत रहे बर प्रेरित करिन।