धर्म नगरी राजिम के मेला स्थल रामोत्सव के थीम म सजाए गए हे
श्री राम के जीवन उपर आधारित झांकी के होवत हे प्रदर्शन
राजिम कुंभ मेला म हजारों मनखे मन ल मिलत हे निःशुल्क भोजन
स्थानीय कलाकार मन ल प्रतिभा प्रदर्शन के मिलत हे मौका
27 फरवरी के मुख्यमंच म गोपा सान्याल के टीम अऊ उर्वसी साहू लोक कलामंच के होवत हे प्रस्तुति
गरियाबंद, 27 फरवरी 2024। मुख्यमंत्री श्री विष्णुदेव साय ह 7 जनवरी 2024 के राजिम भक्तिन माता जयंती के अवसर म कहे रहिन कि राजिम कुंभ के भव्यता फेर लहुटही। देश भर ले साधु संत ये मां सामिल होए आहीं। मुख्यमंत्री श्री साय के विशेष पहल ले राजिम कुंभ के वैभवता फेर लहुट आए हे। संस्कृति मंत्री श्री बृजमोहन अग्रवाल के निगरानी म राजिम कुंभ कल्प-2024 ए पईत भगवान श्रीराम ल समर्पित करत पूरा कुंभ के संरचना श्रीराम के थीम उपर आधारित हे। कुंभ मेला परिसर म जगा-जगा भगवान श्रीराम अऊ ऊंखर आराध्य भगवान सदाशिव के प्रतिमा रंगोली अऊ कट-आउट जगा-जगा दिखे ले पूरा राजिम ह राममय नजर आवत हे। इहां अवइया स्थानीय लोक मंच के कलाकार संग राष्ट्रीय स्तर के कलाकार मन के गायिकी म घलोक राम रस बरसत नजर आवत हे। भगवान श्री राजीव लोचन जेन खुद भगवान विष्णु के अवतार ये, त प्रभु श्री राम घलोक विष्णु के अवतार ये अऊ इहां श्रीराम के थीम म आयोजित कुंभ म जगा-जगा विराजे राम ल देखके अइसे लगथे मानो छत्तीसगढ़ के ए पावन भुइंया म स्थित लोमश ऋषि आश्रम म मानो फेर राम पधारे हे अऊ संगम के तट म राम के राम ले मिलन होवत हे। ए अनुपम छटा के साक्षात्कार जब संझा के लेजर लाइट अऊ साउंड के माध्यम ले होथे तब उपस्थित जन समुदाय भक्ति के ओ रोमांच ले भाव विभूत हो जाथे जेखर वरनन करना जन-साधारण बर असंभव हे ए रोमांच ल सिरिफ महसूस करे जा सकथे।
झांकी के माध्यम ले प्रभु श्री राम के आदर्श अऊ ऊंखर छत्तीसगढ़ वनवास अवधि ल जाने अऊ देखे के मिलत हे अवसर –
राजिम कुंभ मेला स्थल म प्रभु श्री राम के जीवन चरित्र अऊ ऊंखर छत्तीसगढ़ वनवास अवधि उपर आधारित जीवंत झांकी के प्रदर्शन करे जात हे। जउन मेला म पहुंचइया जम्मो श्रद्धालु मन ल अपन कोति सहजेच आकर्षित करत हे। मनखे धार्मिक सद्भाव अऊ मर्यादा पुरुषोत्तम श्री राम के आदर्श ल अनुभव करके ए झांकी के आनंद उठावत हें।
मुख्य मंच म होवत हे प्रसिद्ध राष्ट्रीय कलाकार मन के प्रस्तुति, 27 फरवरी के मुख्यमंच म गोपा सान्याल के टीम अऊ उर्वसी साहू लोक कलामंच के प्रस्तुति होवत हे-
मेला म मुख्यमंच म राष्ट्रीय अउ लोक कलाकार मन के प्रस्तुति देखके दर्शक घलोक झूमे ल मजबूर होवत हें। 24 फरवरी ले शुरू राजिम कुंभ के दूसर दिन इतवार के मुख्यमंच म छत्तीसगढ़ के फिल्म स्टार राजेश अवस्थी के शानदार प्रस्तुति देखके दर्शक घलोक नाचे थिरके लगिन। मुख्य मंच म कार्यक्रम के पहली प्रस्तुति लोकधारा के संचालक राजेश साहू करडरका कुम्हारी ह गणेश वंदना के संग शुरूआत करिस। कुमार पण्डित ह शास्त्रीय गायन के प्रस्तुति दीस। कार्यक्रम के आखरी प्रस्तुति अमर श्रीवास के टीम ह छतीसगढ के परंपरा ल जीवंत देखाय के बखूबी प्रयास करिस। मंगलवार 27 फरवरी के मुख्यमंच म गोपा सान्याल के टीम अऊ उर्वसी साहू लोक कलामंच के प्रस्तुति होवत हे। आन कार्यक्रम मन म भावना टांक रायपुर के गायन, रोशन कुमार साहू नंदनी के हमर छत्तीसढ़ लोकमंच के प्रस्तति होही।
राजिम कुंभ मेला म हजारों मनखे मन ल मिलत हे निःशुल्क भोजन –
राजिम कुंभ मेला म पहुंचइया श्रद्धालु, मेलार्थी ल कोनो प्रकार के परेशानी झन होवय एकर पूरा ख्याल रखे जात हे। राजिम मेला पहुंचे बर रायपुर, धमतरी, महासमुंद अऊ गरियाबंद चारो जिला मन के कई जगा मन ले बस के सुविधा रखे गए हे। उहें मेला म अवइया सबो श्रद्धालु मन के मूलभूत सुविधा जइसे भोजन, पेयजल, शौचालय के व्यवस्था रखे गए हे।
राजिम कुंभ म लोकमंच के कलाकार मन ह दर्शक के वाहवाही लूटत हें –
मुख्य मंच म क्षेत्र के स्थानीय कलाकार मन ह अपन रंगारंग सांस्कृतिक प्रस्तुति देवत हें अऊ दर्शक मन के वाहवाही लूटत हें। इही कड़ी म शांति साहू अऊ ऊंखर सहयोगी कलाकार मन ह भजन गाके पूरा माहौल भक्तिमय कर देहे रहिस। गायिका ऐश्वर्या साहू के गाए भजन वीर हनुमाना ल श्रोता मन ह अड़बड़ पसंद करिन।
