- देश अऊ विदेश ले आए जनजातीय कलाकार मन के डांस वीडियो जमके होवत हे वायरल
- हर घण्टा 2 हजार मनखे देखत हें टीजर वीडियो
- श्री राहुल गांधी के मुख्य आतिथ्य म आयोजित शुभारंभ समारोह के वीडियो ल 90 हजार मनखे मन ह देखिन
रायपुर, छत्तीसगढ़ के राजधानी रायपुर म आयोजित राष्ट्रीय आदिवासी नृत्य महोत्सव ल लाखों मनखे सोशल मीडिया के सहारे घर बइठे ही आनंद उठावत हें। जारदरहा जाड़ के बाद घलव साईंस कॉलेज मैदान म देर रात तक बड़ संख्या म मनखे देश अऊ विदेश ले आए जनजातीय कलाकार मन के मनमोहक नृत्य मन के लुत्फ उठावत हें उहें लाखों के संख्या म मनखे अपन घर म ही बइठके सोशल मीडिया के सहारे एला लाइव देखत हें।
मुख्यमंत्री अऊ जनसंपर्क विभाग के संगेच ट्राइवलफेस्ट-2019 के ऑफिशियल फेसबुक पेज म आदिवासी नृत्य महोत्सव के लाईव प्रसारण होए ले ये कार्यक्रम ह प्रदेश के संगेच देश-विदेश म बइठे मनखे मन तक अपन आसान पहुंच सुनिश्चित करे हे। महोत्सव के दूसर दिन के कार्यक्रम मन के टीजर वीडियो ल सिरिफ 6 घण्टा म ही 13 हजार मनखे मन ह देख लेहे रहिन। ये वीडियो ल हर घण्टा 2 हजार ले जादा मनखे देखत हें। अइसनहे पहिली दिन श्री राहुल गांधी के मुख्य आतिथ्य म आयोजित महोत्सव के शुभारंभ समारोह के वीडियो ल अब तक 90 हजार ले जादा मनखे मन ह देख लेहे हें अऊ ये संख्या सरलग लउहे बाढ़त हे।
छत्तीसगढ़ म पहली पदत आयोजित राष्ट्रीय आदिवासी नृत्य महोत्सव ल लेके मनखे मन के कमेन्टस् घलोक जबरदस्त आवत हे। श्री सूर्यकांत सिन्हा ह ये अनोखा पहल बर मुख्यमंत्री ल धन्यवाद देवत कहे हें कि ये आयोजन ले निश्चित ही आदिवासी कलाकार मन के गंवाए सम्मान ओ मन ल वापस मिलही। श्री जीवन लाल चन्द्राकर ह लिखे हें कि हमर कला अउ संस्कृति के सुघ्घर पहिचान, सबला देवत हे बराबर सम्मान। श्री हितेश देशमुख ह लिखे हें कि ये आयोजन ह छत्तीसगढ़ अऊ इहां के आदिवासी मन के मान विश्व म बढ़ाए हे। श्री हरीश कौशिक ह लिखे हें कि एखर से छत्तीसगढ़ ल एक नवा पहिचान मिले हे। सुश्री सुधा सरोज ह लिखे हें कि अइसन मंच ल बारम्बार नमन जउन ह पूरा देश ल एक होए के संदेश देवत हे। श्री सुमीत तिवारी ह लिखे कि राज्य बने के बाद पहली पइत अइसन आयोजन होइस।
