- मजदूर मन ह अपन प्रदेश के जमीन ल करिन नमन अऊ मुख्यमंत्री के मानि आभार
रायपुर, 15 मई 2020। मुख्यमंत्री श्री भूपेश बघेल के निर्देशन म छत्तीसगढ़ के प्रवासी मजदूर मन ल दूसर राज्य ले लाय के सिलसिला म जांजगीर-चांपा जिला के 521 श्रमिक ल लेके वीरामगाम (गुजरात) ले स्पेशल ट्रेन चांपा रेलवे स्टेशन पहुंचिस। चांपा रेलवे स्टेशन पहुंचतेच मजदूर मन के चेहरा म सुकून अऊ खुशी के भाव रहिस। करीब 40 दिन के लाकडाउन म फंसे सबो मजदूर मन ह अपन गृह जिला जांजगीर-चांपा पहुंचे म मुख्यमंत्री भूपेश बघेल ल धन्यवाद देवत उंन ल आभार जताइन। जिला प्रशासन ह चांपा रेलवे स्टेशन म पहिली ले ही प्लेटफार्म ल सेनेटाईज करके, मजदूर मन बर भोजन, पेयजल, अऊ स्वास्थ्य जांच के मुकम्मल व्यवस्था ठउका करे रहिस।
रेलवे स्टेशन के प्लेटफार्म म रेल म सवार सबो 521 मजदूर मन ल नास्ता, पानी देहे गीस। एखर बाद 2-2 बोगी के अंतराल म मजदूर मन ल ट्रेन ले उतारके सोशल डिस्टेंस के पालन करत खंडवार स्थापित स्वास्थ्य विभाग के स्टाल म थर्मल स्कैनिंग अऊ स्वास्थ्य जांच के कार्यवाही करे गीस। मजदूर मन ल ऊंखर विकासखंड वार बस मन म बइठाये गीस अऊ उमन ल निरधारित कवारंटींन सेंटर बर रवाना करे गीस।
गुजरात के पलोडा म राजमिस्त्री अऊ मजदूरी के काम करे गे जांजगीर-चांपा जिला के विकास खंड पामगढ़ के ग्राम मुलमुला के जानकी बाई, निक्की, सिल्ली के चंदराम, अनिल टंडन, चंडीपारा पामगढ़ के छेरका खरे, मनबाई अऊ गंगाधर रेल के लंबा यात्रा के बाद घलोक अपन गृह जिला पहुंचे म अड़बड़ खुश दिखत रहिन। तूँ मन ल गुजरात ले चांपा रेल ले लाय म कोन मदद करिस, पूछे म उमन झट ले छत्तीसगढ़ के मुख्यमंत्री श्री भूपेश बघेल के नाम लीन। ए सबो श्रमिक मन ह मुख्यमंत्री ल धन्यवाद देवत उंखर प्रति आभार जताइन।