नवा शिक्षा नीति 2020 उपर आधारित राज्यपाल मन के सम्मेलन म राज्यपाल ह महत्वपूर्ण सुझाव दीन
नवा शिक्षा नीति ल मील के पत्थर साबित होए म विश्वास जताइन
रायपुर, 08 सितमबर 2020। राष्ट्रपति श्री रामनाथ कोविंद अऊ प्रधानमंत्री श्री नरेन्द्र मोदी ह आज राष्ट्रीय शिक्षा नीति 2020 विसय उपर आधारित राज्यपाल मन के सम्मेलन म सबो राज्यपाल, उपराज्यपाल मन ल वीडियो कॉफ्रेंसिंग के माध्यम ले संबोधित करिन। सम्मेलन म केंद्रीय शिक्षा मंत्री श्री रमेश पोखरियाल निशंक ह घलोक अपन संबोधन दीन। राज्यपाल सुश्री अनुसुईया उइके ह अपन संबोधन म कहिन के राष्ट्रीय शिक्षा नीति कई मामला म मील के पत्थर साबित होही। उमन राष्ट्रीय शिक्षा नीति के-2020 के संबंध म महत्वपूर्ण सुझाव दीन। राज्यपाल ह कहिन -जनजातिय मन के भाखा जेमां गोंडी घलोक सामिल हे ओ मन ल प्राथमिक स्तर के शिक्षा म सामिल करे जाना चाही, एखर से जनजाति समाज अऊ उंखर नवा पीढ़ी अपन भाषा-संस्कृति ल समझ सकहीं अऊ ओखर से पाए ज्ञान ल संरक्षित रख पाहीं। उमन कुछ राज्य मन म जिहां म जनजाति मन के संख्या जादा हे उहां संबंधित क्षेत्र म स्थानीय स्तर म जनजाति-भाषा के शिक्षक मन के नियुक्ति करे अऊ नियुक्ति म क्षेत्रीय, जनजाति-गोंडी भाखा के शिक्षक मन बर पद आरक्षित करे उपर जरूरत व्यक्त करिन। राज्यपाल ह राष्ट्रपति, प्रधानमंत्री अऊ केंद्रीय शिक्षा मंत्री संग खांटी जानकार ल नवा शिक्षा नीति 2020 बर धन्यवाद घलोक दीन।
