मंत्री श्रीमती अनिला भेड़िया पहुंचिन दुर्ग के संप्रेक्षण गृह, लइका मन ले कहिन समय के रचनात्मक उपयोग करव

– संप्रेक्षण गृह म लीन व्यवस्था के जानकारी, बुनियादी सुविधा मन के उपलब्धता ले होइन संतुष्ट
– वृद्धाश्रम, सखी सेंटर अऊ बाल गृह के घलोक करिन निरीक्षण

दुर्ग 09 अपरेल 2020। महिला अउ बाल विकास मंत्री श्रीमती अनिला भेड़िया ह आज दुर्ग जिला म स्थित संप्रेक्षण गृह के निरीक्षण करिन। इहां उमन व्यवस्था के जानकारी लीन अऊ बुनियादी सुविधा मन के उपलब्धता ले संतुष्ट होइन। मंत्री ह लइका मन ले घलोक चर्चा करिन। उमन कहिन के अपन समय के रचनात्मक उपयोग करव। समाचार सुनव, अच्छा साहित्य पढ़व, अच्छा बात मन के मनन करव। उमन कहिन के तु मन के परिवार ल बहुत अच्छा लागही, जब तु मन एक अच्छा उद्देश्य लेके काम करिहव। खूब मेहनत करव। रचनात्मक चीज मन म रुचि दिखाव। उमन लइका मन ले इहां बुनियादी सुविधा मन के उपलब्धता के बारे म जानकारी घलोक लीन। लइका मन ह बताइन के ओ मन ल कोनो प्रकार के दिक्कत नइ हे। मंत्री ह लइका मन ले कोरोना संक्रमण के बारे म घलोक पूछिन। लइका मन ह बताइन के कोरोना वायरस के संक्रमण ल लेके पूरा दुनिया सोशल डिस्टेंसिंग के सहारा लेवत हे ताकि कोरोना ले बच सकंय। हमन घलोक एक दूसर ले दूरी रखत हवन अऊ मास्क के उपयोग करत हन। मंत्री ह कहिन के बने बात हे जऊन जतका जादा समाचार माध्यम मन के निकट संपर्क म रहिही, ओखर जागरूकता के स्तर अच्छा रहिही अऊ ओखर लाभ घलोक ओला वोतकेच मिलही।

जिला कार्यक्रम अधिकारी श्री विपिन जैन ह ओ मन ल संप्रेक्षण गृह म उपलब्‍ध कराए गए सुविधा मन के बारे म विस्तार ले जानकारी दीन। संप्रेक्षण गृह के स्टाफ ले घलोक मंत्री मिलिन। उमन कहिन के आप मन अइसनहे मेहनत करव, एकर अच्छा नतीजा आही।

वृद्धाश्रम म सियान मन बताइन के अइसन संक्रमण कभू नइ सुने रहेन– श्रीमती भेड़िया वृद्धाश्रम घलोक पहुंचिन। उमन कहिन के अभी आप मन के तीर ए खातिर आए हंव के आप मन के सेहत जान सकंव अऊ आप मन के व्यवस्था मन के बारे म जान सकंव। अभी कोरोना के संक्रमण तेजी ले फैलत हे। आप मन अपन विशेष ध्यान रखव। सोशल डिस्टेंसिंग बनाके रखव अऊ हमेशा मास्क पहिन के रखव। सियान मन ह बताइन के हां, हमन घलोक रोज कोरोना संक्रमण के बारे म सुनत हन। 89 साल के एक सियान ह कहिस के अपन अतका लंबा जिंदगी म मैं ह कभू अइसन व्यापक संक्रमण के बारे म नइ सुने रहेंव। मंत्री ह पूछिन के आप मन ल भोजन समय म अऊ गुणवत्तापूर्वक मिलत हे के नहीं। ये म सियान मन ह बताइन के हां, हमला ये सब सुविधा बने सहिन ले मिलत हे।

सखी सेंटर अऊ बाल गृह घलोक पहुंचिन मंत्री– मंत्री ह सखी सेंटर अऊ बाल गृह के निरीक्षण घलोक करिन। सखी सेंटर म अब तक के गतिविधि मन के जानकारी लीन। ऊंखर रजिस्टर देखिन अऊ उहां पदस्थ अमला ले अब तक करे गए काम मन के जानकारी लीन। उमन कहिन कि आप मन के काम बहुत महत्वपूर्ण हे। आप मन कोति ले उठाये गए प्रभावी कदम मन ले पीड़ित महिला मन ल जल्दी राहत मिल पाही।

लउछरहा..