नौसेना के नवा जहाज मन के नामकरण होही छत्तीसगढ़ के नदिया मन के नाव म, प्रदेश म सेना भर्ती रैली के प्रस्ताव

नई दिल्ली, छत्तीसगढ़ के मुख्यमंत्री श्री विष्णुदेव साय ह आज नई दिल्ली म केंद्रीय रक्षा मंत्री श्री राजनाथ सिंह ले ऊंखर निवास म सौजन्य मुलाक़ात करिन। बैठक म बिलासपुर एयरपोर्ट के विस्तार, रक्षा क्षेत्र के विकास, पूरा प्रदेश म सेना भर्ती रैली मन के आयोजन अऊ नौसैनिक जहाज मन के नामकरण जइसे कई महत्वपूर्ण विषय मन उपर सार्थक चर्चा होइस। ए बेरा म केंद्रीय आवासन अऊ शहरी काम राज्यमंत्री श्री तोखन साहू अऊ मुख्यमंत्री के प्रमुख सचिव श्री सुबोध कुमार सिंह घलोक उपस्थित रहिन।
मुख्यमंत्री श्री विष्णुदेव साय ह बैठक के समय रक्षा मंत्री श्री राजनाथ सिंह ल अवगत कराइन के बिलासपुर म रक्षा मंत्रालय के जमीन हे। ए जमीन ल उमन बिलासपुर एयरपोर्ट के विस्तार खातिर उपलब्ध कराए के अनुरोध करिन। एखर संगेच मुख्यमंत्री ह इहां रक्षा क्षेत्र ले संबंधित विकासात्मक काम घलोक सुरू करे के आग्रह करिन।
मुख्यमंत्री ह ये घलोक रेखांकित करिन के छत्तीसगढ़ म सेना म भर्ती होए के प्रति युवा मन म विशेष उत्साह हे। उमन कहिन के प्रदेश के युवा मन म अनुशासन, शारीरिक क्षमता अऊ देशभक्ति के भावना हे। ए आधार म उमन रक्षा मंत्री ले आग्रह करिन के पूरा प्रदेश म विशेष “सेना भर्ती रैली” के आयोजन करे जाए, जेखर से युवा मन ल अपने प्रदेश म देश सेवा के अवसर मिल सकय।
बैठक म मुख्यमंत्री ह राज्य के सांस्कृतिक पहिचान अऊ गौरवशाली परंपरा मन के घलोक उल्लेख करे गीस। उमन कहिन के छत्तीसगढ़ के नदिया — इंद्रावती, महानदी — केवल जलस्रोत भर नो हे, बल्कि प्रदेश के आत्मा ये। उमन सुझाव दीन के रक्षा मंत्रालय जब नवा नौसैनिक पोत या जहाज ल लॉन्च करही, त ओमां ले कुछ के नाव छत्तीसगढ़ के नदि मन अऊ क्षेत्र मन के नाव म रखे जाय, जइसे INS इंद्रावती, INS महानदी या INS बस्तर। ये न केवल प्रतीकात्मक रूप ले सुंदर होही, बल्कि छत्तीसगढ़ के सांस्कृतिक पहिचान ल राष्ट्रीय अऊ अंतरराष्ट्रीय स्तर म गौरव देवाही।