कुंआ बने ले सिंचाई के समस्या होइस दूर, अब पूरा खेत मन म लहलहाथे फसल
रायपुर, 10 सितमबर 2024। जिला के कोटा ब्लॉक के आदिवासी क्षेत्र ग्राम पंचायत चुरेली म मनरेगा ले बने कुंवा ह एक गरीब किसान परिवार के जिंदगी संवार देहे हे। हितग्राही श्रीमती बिरसिया के सपना अब साकार होए लगे हे। उमन कहिन के खेती-किसानी के समय धान मन ल भरपूर पानी मिले ले सबो खेत मन म फसल के पैदावार होवत हे, जेखर से खेती ले बने मुनाफा मिलत हे अऊ उंखर आर्थिक स्थिति म सुधार होवत हे। सरकार ह मनरेगा योजना ले ये जेन सहायता देवत हे वो ह वोकर परिवार बर अड़बड़ मददगार साबित होए हे।
श्रीमती बिरसिया ह बताइस के वोखर पास लगभग 2.5 एकड़ उपजाउ जमीन हे, फेर पानी अउ सिंचाई के साधन नइ होए के सेती 1 ले 1.15 एकड़ जमीन म ही फसल होथे। ओ मन ल बहुत चिंता होत रहिस के वोखर आधा खेत मन म फसल नइ लग पावय। वो ह बताइस के ग्राम रोजगार सहायक के माध्यम ले ओ मन ल कुंआ निर्माण कराए के सुझाव मिलीस, जेखर से उमन ल हर मौसम म पानी के समस्या के समाधान मिल जाही। बिरसिया बाई ह कुंआ बर आवेदन करिस। पंचायत प्रस्ताव के माध्यम ले मनरेगा योजना ले कुंआ पास होइस। 387 मानव दिवस काम ले कुंआ खुदाई के काम पूरा होइस। कुंआ बने के कुछ समय बाद ही कुंआ म जल भराव होना चालू हो गे। कुंआ बने ले बारों महीना पानी मिले लगीस। अब वो ह पूरा 2 एकड़ म फसल ले पात हे अऊ अब दू फसल घलोक लगाथे। अब ओ ल बारिश उपर निर्भर नइ होना परय। ए कुंआ ले आसपास के लगभग 8 ले 10 परिवार पीए के पानी बर घलोक कुंआ के उपयोग करत हे। वो ह कुंआ के पानी ले घर म ही अपन बाड़ी बनाय हे, जेखर से घर परिवार बर सागग-भाजी मिलत हे। अऊ फसल के पैदावार बढ़े ले आमदनी म घलोक बढ़ोत्तरी होए हे। घर के आर्थिक स्थिति म घलोक सुधार आए हे।
