आधार मा गलत नाम के सेती होवत रहिस परेशानी, अब ऑनलाइन सुविधा ले मिलिस राहत
दंतेवाड़ा, सेवा सेतु पोर्टल नागरिक मन बर सरकारी योजना अउ प्रमाण-पत्र मन के प्रक्रिया ला बहुते सरल बनाथे। अब मनखे घर बइठे मोबाइल या ऑनलाइन माध्यम ले आय, निवास, बिहाव पंजीयन अउ आन जरूरी सेवा तय समय-सीमा मा पा सकत हें, जेकर से दफ्तर मन के चक्कर काटे के जरूरत खतम होगे हे। मुख्यमंत्री श्री विष्णुदेव साय के अगुवई मा प्रदेश सरकार डहर ले चलाए जात सेवा सेतु पहल नागरिक मन बर बड़का राहत बनके उभरत हे। ए पहल के असली उद्देस लोगन ला घर के नजदीक सरल, सुघ्घर अउ पारदर्शी शासकीय सेवा मन ला उपलब्ध कराना हे। दंतेवाड़ा जिला के रहइया श्रीमती धिन्नो कड़ियामी ला घलो ए पहल के सोझ लाभ मिलिस।
आधार कार्ड मा नाम गलत लिखे के सेती श्रीमती धिन्नो कड़ियामी ला लंबा समय ले अलग-अलग शासकीय योजना मन के लाभ पाए मा तकलीफ होवत रहिस। महतारी वंदन योजना समेत आन योजना मन के रासि घलो उंकर खाता मा नइ पहुँच पावत रहिस। पहिली आधार कार्ड मा नाम सुधार कराए बर राजपत्र (गजट) मा नाम छपवाना जरूरी रहिस। एकर बर कागज जमा करे राजनांदगांव जाना परत रहिस, जेकर से समय, पइसा अउ मेहनत तीनों के भारी नुकसान होवत रहिस।
ऑनलाइन सुविधा ले मिलिस बड़का राहत
सेवा सेतु के माध्यम ले अब ए सुविधा ऑनलाइन मिलत हे। श्रीमती धिन्नो कड़ियामी ह जरूरी दस्तावेज मन ला ऑनलाइन जमा करके राजपत्र मा नाम संसोधन के प्रक्रिया सुरू कराइस। एकर ले राजपत्र मा नाम छपे के प्रक्रिया सरल होगे अउ आधार कार्ड मा नाम सुधार के रद्दा घलो आसान होगे। ओ ह बताइस के सेवा सेतु के ऑनलाइन सुविधा ले ओला घेरी-बेरी दफ्तर मन के चक्कर काटे ले मुकती मिलगे। अब पूरा प्रक्रिया पहिली के तुलना मा जादा सुविधाजनक अउ साफ-सुथरा होगे हे।
दूर-दराज क्षेत्र के लोगन मन बर वरदान
श्रीमती धिन्नो कड़ियामी ह मुख्यमंत्री श्री विष्णुदेव साय अउ जिला प्रशासन के आभार जतावत कहिन के सेवा सेतु कस पहल दूर-दराज क्षेत्र के लोगन बर बहुते उपयोगी हे। एकर ले समय अउ पइसा के बचत होए के संगे-संग शासकीय योजना मन के लाभ पाए के प्रक्रिया घलो आसान होगे हे। ए सफलता के कहानी बताथे के सेवा सेतु पहल आम मनखे मन तक शासकीय सेवा ला सरल अउ असरदार ढंग ले पहुँचाए मा बड़का भूमिका निभावत हे अउ जरूरतमंद लोगन मन के जिनगी मा सुघ्घर बदलाव लावत हे।
