कोलिहामार गुरुर म आयोजित विश्व आदिवासी दिवस समारोह म सामिल होइन मुख्यमंत्री
नारागांव के चार स्वतन्त्रता संग्राम सेनानी मन के प्रतिमा स्थापित करे अऊ शासकीय महाविद्यालय गुरुर के नामकरण स्व.डारन बाई तारम के नाम ले करे के घोषणा
आदिवासी सामुदायिक भवन के निर्माण, मुख्य मार्ग गुरूर म शहीद वीर नारायण सिंह के प्रतिमा के स्थापना, प्री.मैट्रिक छात्रावास अऊ सामुदायिक स्वास्थ्य केन्द्र के जीर्णोद्धार संग कई ठन विकास काम मन के दीन सौगात
बालोद, मुख्यमंत्री श्री भूपेश बघेल ह कहिन के देश ल स्वाधीन कराए अऊ राष्ट्र अऊ समाज के नवनिर्माण म आदिवासी समाज के भूमिका बहुत महत्वपूर्ण हे। श्री बघेल ह कहिन कि पूरा देश के जइसे हमार छत्तीसगढ़ म घलोक शहीद गुण्डाधुर, परलकोट के जमींदार शहीद गैंदसिंह नायक, सोनाखान के जमींदार शहीद वीर नारायण सिंह संग बहुत अकन आदिवासी महापुरूष अऊ स्वतंत्रता संग्राम सेनानी मन ह अंग्रेज मन के खिलाफ क्रांति के शंखनाद करके अपन प्राण के आहुति देहे रहिन। उमन आदिवासी समाज ल शांत, सरल अऊ मेहनतकश समाज बतात कहिन कि हमर सरकार आदिवासी मन के विकास अऊ ऊंखर हित मन के संरक्षण बर कटिबद्ध हे। ये बेरा म उमन कार्यक्रम म उपस्थित मनखे मन ल विश्व आदिवासी दिवस के बधाई अऊ शुभकामना घलोक दीन।
मुख्यमंत्री श्री बघेल आज बालोद जिला के गुरूर विकासखण्ड के ग्राम कोलिहामार म आदिवासी गोंडवाना सेवा समिति तहसील गुरूर कोति ले आयोजित विश्व आदिवासी दिवस समारोह के अवसर म अपन उद्गार व्यक्त करत रहिन। श्री बघेल कार्यक्रम म मुख्य अतिथि के रूप म उपस्थित रहिन। कार्यक्रम म महिला अऊ बाल विकास अऊ समाज कल्याण मंत्री श्रीमती अनिला भेंडिया, संसदीय सचिव अऊ गोण्डवाना समाज के राष्ट्रीय अध्यक्ष श्री शिशुपाल शोरी, संसदीय सचिव श्री कुंवर सिंह निषाद, संजारी-बालोद के विधायक श्रीमती संगीता सिन्हा, गोंडवाना समाज के प्रदेश अध्यक्ष श्री नीलकंठ टेकाम संग आन अतिथिगण उपस्थित रहिन।
ये बेरा म मुख्यमंत्री श्री बघेल ह ग्राम नारांगाव के स्वतंत्रता संग्राम सेनानी स्व. सुकालू राम कड़ियाम, स्व.बिसाहू राम गायकवाड़, स्व.पीताम्बर मंडावी, स्व.सरजू राम मंडावी संग चारो स्वतंत्रता संग्राम सेनानी मन के स्मृति ल अजर-अमर करे बर ऊंखर प्रतिमा के निर्माण करे बर 20 लाख रूपिया अऊ शासकीय महाविद्यालय गुरूर के नामकरण क्षेत्र के पहिली आदिवासी विधायक डारन बाई तारम के नाम ले करे, आदिवासी सामुदायिक भवन के मरम्मत बर 50 लाख रूपिया, प्री.मैट्रिक बालक छात्रावास के 20 सीट ल बढ़ाके 50 सीट करे अऊ मरम्मत बर 20 लाख रूपिया, मुख्य मार्ग गुरूर म शहीद वीर नारायण सिंह के प्रतिमा स्थापित करे बर 10 लाख रूपिया अऊ बालोद के बूढ़ातालाब के सौंदर्यीकरण कराए अऊ सामुदायिक स्वास्थ्य केन्द्र गुरूर के मरम्मत कराए के घोषणा करिन। एखर अलावा उमन ग्राम कोलिहामार ग्राम के विकास बर 20 लाख रूपिया के राशि स्वीकृत करे अऊ विकासखण्ड मुख्यालय गुरूर म पोस्ट मैट्रिक बालक छात्रावास खोले के घोषणा घलोक करिन।
ये बेरा म मुख्यमंत्री श्री बघेल ह आदिवासी मन के संगें-संग समाज के हर एक वर्ग के विकास अऊ कल्याण बर राज्य सरकार कोति ले करे जात काम मन के संबंध म विस्तारपूर्वक जानकारी दीन। उमन कहिन कि हमर सरकार समाज के सबो वर्ग के संगें-संग किसान अऊ मजदूर मन ल घलोक सबल अऊ आत्मनिर्भर बनाए के काम करत हे। एखर खातिर राज्य सरकार कोति ले राजीव गांधी किसान न्याय योजना, राजीव गांधी ग्रामीण भूमिहिन कृषि मजदूर न्याय योजना, गोधन न्याय योजना आदि महत्वपूर्ण योजना संचालित करे जात हे। उमन कहिन कि अवईया 20 अगस्त के राजीव गांधी किसान न्याय योजना के दुसर किश्त के राशि किसान मन के खाता म जमा कर देहे जाही। एखर संगें-संग राज्य म धान के अलावा कोदो-कुटकी, रागी आदि फसल मन के घलोक समर्थन मूल्य म खरीदी करे जात हे।
श्री बघेल ह कहिन कि राज्य सरकार कोति ले 65 प्रकार के वनोपज मन के खरीदी समर्थन मूल्य म करे जात हे। उमन कहिन कि हमर सरकार ह आदिवासी अऊ ग्रामीण क्षेत्र मन म निवासरत मनखे मन ल उंखर वाजिब अधिकार देवाए बर वनाधिकार पत्र, जमीन वापसी, वन संसाधन अधिकार देहे आदि के महत्वपूर्ण काम करे हे। ये बेरा म उमन राज्य सरकार कोति ले राज्य म पेशा कानून के उचित क्रियान्वयन बर करे जात काम मन के संबंध म घलोक जानकारी दीन।
मुख्यमंत्री श्री बघेल ह राज्य शासन के महत्वाकांक्षी नरवा, गरूवा, घुरवा अऊ बाड़ी योजना अऊ गोधन न्याय योजना ल ग्रामीण अर्थव्यवस्था ल मजबूत करे अऊ राज्य के विकास बर महत्वपूर्ण योजना बतात एखर लाभ के संबंध म विस्तारपूर्वक जानकारी दीन। उमन कहिन कि ये योजना के लागू होए ले अब राज्य के मनखे मन ल अवारा पशु मन के समस्या ले मुक्ति मिले के संगें-संग अब गोबर अऊ गोमूत्र ले घलोक आमदनी होवत हे। एखर संगेच लउहे लइका मन के कुपोषण ल दूर करे बर गौठान मन ले ही दूध मिले लगही।
श्री बघेल ह राष्ट्र अऊ समाज के सर्वांगीण विकास बर शिक्षा ल बहुत जरूरी बतात कहिन कि ये दिशा म हमर सरकार सरलग काम करत हे। ए पाए के हम प्रदेश के सबो शाला मन म समुचित मात्रा म शिक्षक मन के नियुक्ति करत हन। श्री बघेल ह कहिन कि बस्तर अऊ सरगुजा संभाग के मनखे मन ल शासकीय सेवा म जादा ले जादा अवसर प्रदान करे बर कनिष्ठ कर्मचारी चयन बोर्ड के गठन करके शासकीय सेवा म उंखर समुचित भागीदारी सुनिश्चित करत हन। श्री बघेल ह राज्य के विशेष पिछड़ी जनजाति के मनखे मन के कल्याण अऊ शासकीय नौकरी देहे बर करे जात काम मन के संबंध म घलोक जानकारी दीन।
ये बेरा म महिला अऊ बाल विकास अऊ समाज कल्याण मंत्री श्रीमती अनिला भेंडिया ह राज्य सरकार ल आदिवासी हितैषी सरकार बतात राज्य सरकार कोति ले आदिवासी अऊ समाज के सबो वर्ग के कल्याण बर करे जात काम मन के संबंध म जानकारी दीन। संसदीय सचिव अऊ गोंडवाना समाज के राष्ट्रीय अध्यक्ष श्री शिशुपाल सोरी ह विश्व आदिवासी दिवस के आयोजन के उद्देश्य अऊ महत्व के संबंध म जानकारी दीन। उमन कहिन कि छत्तीसगढ़ सरकार समाज के हर एक वर्ग के कल्याण बर काम करके सुराजी गॉव के परिकल्पना ल साकार करत हे। संसदीय सचिव श्री कुंवर सिंह निषाद ह गौरवशाली विरासत अऊ उंखर सांस्कृतिक विरासत के संबंध म रोचक अऊ प्रेरणास्पद जानकारी दीन। क्षेत्रीय विधायक श्रीमती संगीता सिन्हा ह स्वाधीनता आंदोलन अऊ समाज के नवनिर्माण म आदिवासी मन के भूमिका उपर प्रकाश डालत अंचल के मांग मन के संबंध म मुख्यमंत्री ल सुरता देवाईन।
कार्यक्रम के गोंडवाना समाज के प्रदेश अध्यक्ष श्री नीलकंठ टेकाम अऊ आदिवासी गोंडवाना सेवा समिति के अध्यक्ष श्रीमती उत्तरा मरकाम ह घलोक संबोधित करिस। ये बेरा म श्री मदन कोर्पे, जिला पंचायत सदस्य श्रीमती चन्द्रप्रभा सुधाकर, डॉ. शंकर उईके संग पुलिस महानिरीक्षक श्री बद्रीनारायण मीणा, कलेक्टर डॉ. गौरव कुमार सिंह, पुलिस अधीक्षक श्री जितेन्द्र कुमार यादव, 14वीं वाहिनी छत्तीसगढ़ सशस्त्र बल के सेनानी श्री डी.आर.आचला अऊ आन जनप्रतिनिधि व समाज प्रमुखगण उपस्थित रहिन।
