शासकीय उच्चतर माध्यमिक विद्यालय म शहीद संजय यादव के प्रतिमा के अनावरण
रायपुर, 23 अगस्त 2024। उपमुख्यमंत्री श्री विजय शर्मा ह रायपुर के टिकरापारा स्थित संजय नगर के शहीद संजय यादव शासकीय उच्चतर माध्यमिक विद्यालय म शहीद श्री संजय यादव के प्रतिमा के अनावरण करिन।
उपमुख्यमंत्री श्री विजय शर्मा ह कहिन कि शहीद संजय यादव के बलिदान छत्तीसगढ़ के इतिहास म अमिट रहिही। उमन कहिन कि नक्सली मन ले लड़ाई लोकतंत्र बचाय के लड़ाई ये। लोकतंत्र के रक्षा बर अपन जीवन के बलिदान देवइया के एहसान हम सबो म हे। उमन कहिन कि शहीद संजय यादव के परिवारजन के बेहतर शिक्षा-दीक्षा के परिणामस्वरूप ही ओ मन जीवन के सर्वाच्च बलिदान देहे बर आगू बढि़स।
उपमुख्यमंत्री श्री शर्मा ह ये घलोक कहिन कि मुख्यमंत्री श्री विष्णुदेव साय के सरकार उन सबो शहीद मन के स्मारक बनवाही, जे मन अपन जीवन ल लोकतंत्र अऊ समाज के रक्षा बर अपन प्राण के उत्सर्ग कर दे हे। ये निर्णय छत्तीसगढ़ के वीर सपूत मन के प्रति हमर कृतज्ञता के चिनहारी होही।
जानबा हे कि शहीद प्रधान आरक्षक श्री संजय यादव के जन्म 21 मार्च 1974 के जिला रायपुर के टिकरापारा, म होइस। उंखर माता के नाम श्रीमती श्यामा बाई यादव अऊ पिता के नाम श्री बरातु राम यादव हे। बचपन ले ही मेधावी अऊ अनुशासित छात्र संजय यादव ह अपन प्राथमिक शिक्षा टिकरापारा के नुतन शासकीय स्कूल अऊ खालसा स्कूल, रायपुर ले प्राप्त करिस।
श्री संजय यादव ह 04 सितंबर 1998 के रायपुर नगर सेवा म भर्ती होके 07 बछर तक सेवा दीस। 2005 म ओकर जिला राजनांदगांव म जीडी आरक्षक के पद म भर्ती होइस अऊ पुलिस विभाग म अपन सेवा दीस। 2008 म वोखर उत्कृष्ठ काम अऊ नक्सली नेटवर्क ल तोड़े के सेती ओ ल आउट ऑफ प्रमोशन देके प्रधान आरक्षक के पद म प्रमोट करे गीस।
12 जुलाई 2009 के शहीद संजय यादव ह राजनांदगांव क्षेत्र के मदनवाड़ा थाना मोहला के अंतर्गत कोरकटटी म नक्सली मुठभेड़ के समय तत्कालीन पुलिस अधीक्षक शहीद श्री विनोद चौबे के संग अदम्य साहस के परिचय देवत वीरगति प्राप्त करिन।
