- मुंगेली म जरूरतमंद के सहायता बर दींन 700 लीटर खाद्य तेल
मुंगेली के कईयोन संस्था, ट्रस्ट संग सब्बो वर्ग लॉक डाउन, जनता कर्फ्यू के बेरा म हर सम्भव मदद करे म लगे हें। कोरोना संक्रमण के रोकथाम/बचाव के मद्देनजर पूरा देश म लॉकडाउन के चलत रोज कमइया-खवईया मजदूर, दीनहीन, असहाय, भिखारी के आगू खाय-पीये के समस्या आ गे हे।
उमन ल सहयोग करे बर मुंगेली जिला के सहायता कोष म इहां के दानवीर मनखे मन दान करत हवय, जेकर से जरूरतमंद मन ल राहत सामग्री के रूप म आवश्यक सामग्री पहुँचाय जावत हे, कुछ समाजसेवी मन घलो लगातार जरूरतमंद ल मदद करके फोटो झिकाके वायरल करत हावंय।
अभी हाल ही म मुंगेली किराना व्यापारी संघ मन 600 लीटर तेल उपलब्ध कराय रहिंन, जेखर वितरण जरूरत के सामग्री के संग करे जात रहिस हे, एखर आलावा खाद्य तेल के कमी होय के चलते आन बाकी सामग्री बिना तेल के वितरण करे जावत रहिस हे, ऐसन घड़ी म सक्रिय संस्था स्टार्स ऑफ टुमॉरो ह मुख्य नगर पालिका अधिकारी ल 700लीटर तेल देय के निर्णय लीस। स्टार्स ऑफ टुमॉरो के टीम ह CMO ल 66500/- राशि के चेक प्रदान करीन। टीम कोति ले ये सराहनीय कदम उठाए गीस। ए घडी म सब्बो मनखे ल एक होके जरूरतमंद के संग देहे ले उंकर दुःख कम हो जाथे।
