डबल सब्सिडी ले छत्तीसगढ़ म सौर ऊर्जा के अंजोर

प्रधानमंत्री सुरुज घर योजना ले अंजोर अऊ राहत
रायपुर, प्रधानमंत्री सुरुज घर मुफ्त बिजली योजना ह छत्तीसगढ़ म ऊर्जा क्रांति के रद्दा ल परखर करे हे। केंद्र सरकार के ए महत्वाकांक्षी योजना ल प्रदेश सरकार के प्रत्यक्ष सहयोग ले दुगुना लाभ मिलत हे। डबल सब्सिडी अऊ हाफ बिजली ले मुफ्त बिजली कोति छत्तीसगढ़ के संकलप अब साकार होए लगे हे। ए योजना ले बिजली के खरचा कम होही अउ आम नागरिक मन बर अकतहा आय के साधन घलोक उपलब्ध होही।
आवासीय मकान मन के छत म सौर पैनल स्थापित करके स्वच्छ, किफायती अऊ स्थायी ऊर्जा उपलब्ध कराना ए योजना के उद्देश्य हे। साल 2024 म घोषणा के बाद ये योजना देशभर म लागू करे गीस अऊ अब छत्तीसगढ़ सरकार ह घलोक ये मा अपन हिस्सेदारी ठउका करे हे। पहिली केंद्र सरकार कोति ले 60 प्रतिशत तक सब्सिडी देहे जात रहिस। राज्य सरकार के भागीदारी ले ये राहत अऊ बाढ़ गए हे। उदाहरणस्वरूप, 3 किलोवाट क्षमता के सौर पैनल के कुल लागत लगभग 1.50 लाख रूपिया होथे। डबल सब्सिडी के बाद उपभोक्ता मन ल अब केवल 30 ले 40 हजार रूपिया के व्यय करना होही।
योजना के अंतर्गत उपभोक्ता मनल बैंक ले 6.5 प्रतिशत ब्याज दर म 10 बछर बर करजा मिल जाही। एखर से मासिक ईएमआई एतका किफायती होही के ये अभी हाल के बिजली बिल ले घलोक कम साबित होही। कुछ बछर बाद उपभोक्ता ल जीवनभर मुफ्त बिजली के लाभ मिलही। घर म जरूरत ले जादा उत्पादित बिजली राज्य के वितरण कंपनी मन ल ग्रिड के माध्यम ले बेचे जा सकही। ये व्यवस्था विशेषकर ग्रामीण अऊ अर्ध-शहरी क्षेत्र मन बर अकतहा आय अऊ आर्थिक आत्मनिर्भरता के साधन बनत हे।
ये योजना आर्थिक दृष्टि के संगें संग पर्यावरणीय दृष्टि ले घलोक लाभकारी हे। हर एक घर “ग्रीन एनर्जी हब” के रूप म विकसित होवत हे अऊ कार्बन उत्सर्जन म कमी लाय म महत्वपूर्ण योगदान देवत हे।