अम्बिकापुर म कोरोना के लड़ई म समूह के महिला मन मास्क बना के देवत हें योगदान

अम्बिकापुर, 23 अप्रैल 2020। कोरोना वायरस के संक्रमण के रोकथाम बर जिला प्रशासन सरगुजा कोति ले व्यापक तैयारी करे जात हे। इही क्रम म मनखे मन ल किफायती दर म गुणवत्ता सहित मास्क उपलब्‍ध कराके कोरोना वायरस के संक्रमण ले निपटे म स्व सहायता समूह के महिला मन महत्वपूर्ण भागीदारी निभावत हें। जिला के सबो सातों विकासखण्ड म करीबन 25 स्व सहायता समूह के महिला मन स्थानीय सामान के मदद ले थ्री लेयर कपड़ा के रियूजेबल मास्क तियार करत हें। अब तक करीबन 1 लाख 639 मास्क तियार होए हे अऊ ए मन ल स्थानीय स्तर म बिक्री करे जात हे। मास्क के बिक्री ले अब तक समूह के महिला मन ह 18 लाख 28 हजार 33 रूपिया के कमई होए हे। समूह के महिला मन मास्क के संगेच सेनिटाईजर के उत्पादन घलोक करत हें। अब तक उमन करीब 343 लीटर सेनिटाईजर के उत्पादन तको करे हें।

मास्क अऊ सेनिटाईजर उत्पादन करइया स्व सहायता समूह मन म अम्बिकापुर विकासखंड के एकता, संतोषी, साईबाबा स्व सहायता समूह, लखनपुर विकासखण्ड के आरती, नारी शक्ति, गायत्री स्व सहायता समूह, उदयपुर विकास खंड के दुर्गा स्व सहायता समूह, मैनपाट विकास खंड के जय माँ बूढ़ी दाई स्व सहायता समूह, लुण्ड्रा विकासखंड के प्रीति, तारा स्व सहायता समूह संग विकास खंड बतौली अऊ सीतापुर के महिला मन सामिल हें। स्व सहायता समूह के महिला मन ल बिहान के मध्यम ले जरूरी प्रशिक्षण अऊ सहयोग प्रदान करे जात हे। मास्क ल सीधा मनखे म ल अऊ मेडिकल दुकान ल बिक्री करे जात हे। बिहान के जिला कार्यक्रम अधिकारी श्री राहुल मिश्रा ह बताइस के स्व सहायता समूह के महिला मन के बनाये कपड़ा के मास्क पर्यावरण अनुकूल हे अऊ एला 3 ले 4 घंटा उपयोग करे के बाद एंटीसेप्टिक सहित पानी ले धोए के बाद सुखाके फेर उपयोग करे जा सकत हे।