कोरोना योद्धा मन बर तियार होवत हे थीम आधारित कलात्मक राखी

रायपुर, 13 जुलाई 2020। कोविड-19 के खिलाफ जंग लड़त कोरोना योद्धा मन के कलाई सजाए बर स्व-सहायता समूह के महिला मन आकर्षक अऊ मनमोहक राखी तियार करत हें। रक्षाबंधन के तिहार बर ये राखी धमतरी जिला के छाती गांव स्थित मल्टी युटिलिटी सेंटर म तियार करे जात हे। कोरोना संकट म काम करत अलग-अलग विभाग मन बर बनाय जात ये राखी ऊंखर कर्तव्य अऊ सेवा उपर आधारित रइही। पुलिस विभाग के राखी म तिरंगा, स्वास्थ्य विभाग के राखी म रेड क्रॉस के चिनहा, स्वच्छ भारत मिशन के राखी म राष्ट्रपिता महात्मा गांधी के चश्मा अऊ आन विभाग मन के राखी म घलोक प्रतीकात्मक स्वरूप अंकित करे जाही। बांस अऊ गोबर ले बने ए सुन्दर अऊ कलात्मक राखी ले कोविड ल हराए म लगे स्वास्थ्य, पुलिस, पंचायत अउ ग्रामीण विकास, आदिवासी विकास, महिला अउ बाल विकास विभाग अऊ स्वच्छ भारत मिशन के 10 हजार ले जादा भाइ मन के कलाई सजही।